Qyzylordadaǵy «Bolashaq» ýnıversıteti qazaq kıno ónerindegi shoqtyǵy bıik tulǵa, rejısser Sháken Aımanovtyń 110 jyldyǵyna oraılastyryp, «Ult bolmysyna ustyn bolǵan óner» atty kezdesý keshin ótkizdi.
Teatr men kınoda qaıtalanbas keıipkerler galereıasyn qalyptastyryp, tuńǵysh kınorejısser retinde mádenı qazynamyzdy jaýhar dúnıelermen baıytqan ult maqtanyshynyń rýhy ulyqtalǵan kezdesýge Qazaqstannyń Eńbek Eri, Qazaqstan jáne KSRO Halyq ártisi Asanáli Áshimov qatysty.
Ýnıversıtet ujymymen kezdesýde áıgili óner ıesi Syrǵa jasaǵan ár saparynan erekshe áser alatynyn aıtty. Biraq bul jolǵy júzdesýdiń orny bólek.
«Sháken Aımanov shyn máninde, dıapazony keń daryn boldy. Men ol kisiniń 3–4 fılmine tústim. Shákeńdeı talantqa shákirt bolǵanymdy taǵdyrdyń syıy dep sanaımyn. Ol kisi jan-jaqty edi. Aǵylshyn teatry men kınosynyń kórnekti tulǵasy Olıve Loýrenspen syılastyǵy – bólek áńgimeniń júgi. Al aýylǵa bara qalsa, qarttarmen de solardyń qataryndaı sóılese beretin. Bul ýnıversıtettiń Shákeńniń mereıtoıyn atap ótýdi onyń atyn ıelengen «Qazaqfılm» stýdııasynan buryn bastap jatqanyna tańǵalyp ta, rıza bolyp ta otyrmyn», – dedi Asanáli Áshimov.
Kezdesýde Sháken Aımanov túsirgen fılmderden ánder oryndaldy. Ýnıversıtet oqytýshylary men stýdentter qadirli qonaqqa saýal qoıyp, áńgime arqaýy kıno óneriniń burynǵysy men búgingisine, jalpy qoǵamdaǵy qundylyqtarǵa oıysty.
Ýnıversıtet quryltaıshysy Baqbergen Dosmambetov mártebeli meımandarǵa alǵysyn jetkizdi. Asanáli Áshimovke «Bolashaq» ýnıversıtetiniń qurmetti professory» mártebeli ataǵyn tapsyryp, qurmet kórsetti.
QYZYLORDA