Elimizdegi zergerlik buıymdardyń kóleńkeli naryǵy 99 paıyzǵa jetedi. Zergerler lıgasy zańdy tulǵalar men jeke kásipkerler qaýymdastyǵynyń prezıdenti Qaısar Jumaǵalıev osylaı dep dabyl qaǵyp otyr. Zańsyzdyqty tyıýdyń birden-bir joly – sıfrlyq tańbalaý.
Zergerler lıgasynyń málimetinshe, elimizde kontrafaktilik sehtar jumys isteıdi. Onda arnaıy jabdyqtardyń kómegimen taýar Túrkııa, Italııa nemese Reseıde jasalynǵanyn málimdeıtin jalǵan shtamptar bar. Adal kásiporyndar kóleńkeli naryqpen básekege túse almaı, óndiristi toqtatýǵa májbúr. Sondyqtan osy jyldyń 1 shildesinen bastap elimizge ákelinetin nemese el aýmaǵynda óndirilgen baǵaly metaldar men asyl tastardan jasalǵan zergerlik buıymdardy bólshek jáne kóterme saýdaǵa ótkizý kezinde mindetti túrde tańbalaý júrgiziletin boldy. Al buryn tańbalanǵan ónimdi aınalymnan mindetti túrde alyp tastaý kerek.
Taýarlardy sıfrlyq tańbalaý jáne qadaǵalaý júıesiniń negizgi maqsaty – elimizdegi taýar aınalymyn ashyq etý. Sondyqtan el aýmaǵynda baǵaly metaldar men asyl tastardan jasalǵan zergerlik buıymdardy mindetti tańbalaýdy engizý dárilik zattardy tańbalaý kezindegideı kezeń-kezeńmen emes, bir rettik bolady.
– Zergerlik buıymdar naryǵy kontrabanda men kontrafaktilik taýarlarǵa toly kezde sıfrlyq tańbalaý bıznesimizdegi ashyqtyq pen ádildikti qamtamasyz etýdiń mańyzdy quralyna aınalady. Sıfrlyq tańbalaý taýardyń búkil jetkizý tizbegi boıynsha ónimniń qadaǵalanýyn jaqsartyp qana qoımaı, tutynýshylarǵa olar satyp alatyn ónimderdiń túpnusqalyǵyna senimdilik beredi, sonymen qatar tutynýshylardyń alaıaqtyǵyna jol bermeý arqyly salanyń turaqtylyǵyn qamtamasyz etýge yqpal etedi. Bul tutastaı alǵanda, salaǵa tutynýshylardyń senimin arttyrýǵa kómektesedi. Memleketpen birlesken kúsh-jigerdiń nátıjesinde ǵana biz naryqtyń tazalyǵy men ashyqtyǵyn qamtamasyz etip, bıznesti damytýǵa jáne tutynýshylar senimine qolaıly jaǵdaı jasaı alamyz. Bul jaýapkershilikti, tipti josyqsyz kásipkerlerge qatysty qylmystyq jaýapkershilikti bir mezgilde kúsheıtkende ǵana múmkin. Bul eki shart tutynýshylardy aldaýdan saqtaıdy, – deıdi Zergerler lıgasynyń tóraǵasy Qaısar Jumaǵalıev.
Indýstrııa jáne qurylys mınıstrligi ókilderiniń aıtýynsha, búginde tańbalanbaǵan zergerlik buıymdardyń qaldyqtaryn satýǵa ruqsat etilgen jáne olardy satýǵa ázirge aıyppul salynbaǵan. Degenmen Saýda jáne ıntegrasııa mınıstrliginiń Tehnıkalyq retteý jáne metrologııa komıteti Ákimshilik quqyq buzýshylyq týraly kodekske ózgerister engizýdi josparlap otyrǵanyn eske sala keteıik. Túzetýler shaǵyn, orta jáne iri bızneske qatysty bolady. Osy jyly Taýarlardy tańbalaý jáne qadaǵalaý jónindegi biryńǵaı operatordyń ókilderi Astana, Almaty jáne Shymkent qalalarynda zergerlik buıymdardy tańbalaý boıynsha oqytý semınarlaryn ótkizedi.
Eske sala keteıik, elimizde mindetti sıfrlyq tańbalaý jáne qadaǵalaý úsh ónim tobyna qoldanylady: 2020 jyldan bastap temeki ónimderine, 2021 jyldyń qarashasynan aıaqkıim ónimderine jáne 2022 jyldyń qarashasynan bastap 90 dárilik zatqa. Al 2024 jyldyń 1 shildesinen bastap dárilik zattardyń 100 paıyzyna qoldanylady.