О́tken jyly Jambyl oblysynda aýyr dert arqalap dúnıege kelgen birneshe nárestege sátti operasııa jasaldy. Bilikti mamandar táýekelge bas tigip, beıkúná sábılerge qolushyn bergen edi. Meıirban dárigerler boıynda qaýipti derti bar taǵy bir náresteniń ómirin saqtap qalýǵa kúsh saldy.
Shý aýdanynyń ortalyq aýrýhanasynda Daýn sındromy jáne basqa da aýyr patologııasy bar náreste dúnıege kelgen. Mamandar kishkentaı sábıdiń týa bitken analdy atrezııa (ishektiń tómengi jaǵynda tesik bolmaıtyn týa bitken aqaý) jáne asqazan-ishek joldarynda aqaý bar ekenin der kezinde anyqtap, shuǵyl túrde oǵan operasııa jasaý kerek ekenin aıtyp, Jambyl oblystyq perınataldyq ortalyǵyna joldaǵan.
Mamandar keltirgen derekke júginsek, ishek artezııasy dep uryq ishektiń damymaǵan bóligin aıtady eken. Saldarynan ishek joldary jartylaı nemese tolyq bitelip qalatyn kórinedi. Bir sózben aıtqanda, beıkúná sábıdiń boıyndaǵy dert jeńil emes. Náresteni emdeý jumystary birneshe kezeńdi qamtıdy.
Jańa týǵan náresteniń jaǵdaıy máz emestigin túsingen dárigerler ábigerge túsken. Oblystyń shtattan tys bas neonatologi Talǵat Tolyqbaev pen neonataldyq hırýrg Nurtýǵan Álqýatovtyń qatysýymen ótken tekserý barysynda mamandar tez arada operasııa jasaý kerek degen sheshimge kelgen. Sarapshylar keltirgen derekke sensek, ýaqytty ótkizip alý bala densaýlyǵy úshin aıtarlyqtaı zor qaýip týdyrǵan eken. Sebebi ishektiń belgili bir quramy syrtqa shyqpaı, toq nemese ash ishek qabyrǵalardyń buzylýyna ákelip soqtyrýy múmkin. Ol ýaqytta naýqas ómirmen qosh aıtysýy da yqtımal. Sondyqtan da táýekelge bel býýǵa týra kelgen. Mamandardyń aıtýynsha, bul patologııany emdeý, sábı boıyndaǵy qaýipti azaıtý úshin birneshe operasııa jasaý qajettiligi týyndaıtyn kórinedi.
Dárigerlerdiń muqııat tekserýinen keıin hırýrgııalyq operasııanyń alǵashqy kezeńine balalar hırýrgi Shavkat Qudaıbergenov, anestezıolog Murat Rústemov jáne meıirbıke Gúlzıra Qabylbekova jedel kirisip ketken. Hırýrgııalyq emdeýdiń alǵashqy satysynda mamandar ish qýysyn qaıta qaraý, stomany joıý jumysyn júzege asyrǵan. Derekke júginsek, operasııa julynnyń analgezııasymen jasalǵan. Bul operasııadan keıingi asqynýlardyń qaýpin edáýir tómendetetin kórinedi.
Dárigerler beker ábiger bolmapty. Jasalǵan operasııadan keıin sábıdiń jaǵdaıy turaqtalǵan. Náreste ýaqtyly tamaqtanady eken. Al ilespe aýrýlar boıynsha mamandar qosymsha tekserý jumystaryn júrgizip jatyr. Sh.Qudaıbergenovtiń aıtýynsha, náreste 6 aıǵa tolǵanda emdeýdiń kelesi kezeńi, ıaǵnı proktoplastıka jasalady.
Jambyl oblysy