Ata-analar keıde balalaryna keıip «О́lim kelgir», «Tuqymyn qurysyn», «Atyń óshkir» degen sııaqty sózderdi aıtyp jatady. Ondaı teris tilekter balanyń tárbıesine jáne minezine keri áser etedi, dep habarlaıdy Egemen.kz.
Eger balańyz til almaıtyn, qarsy shyǵatyn shataq bop ósip jatsa nemese sabaqqa selqos, jaman júriske úıir bolsa, demek onyń ondaı bop ósýinde ata-ananyń oǵan qatysty abaısyzda ne ashýmen aıtqan teris batasynyń da áseri bar.
Sol sebepti balalarymyzǵa ashýlanǵanda ne renjigende tilimizge abaı bolýymyz kerek. Buǵan baılanysty kitaptarda mynadaı oqıǵa baıan etiledi: Ábý Hanıfanyń shákirtteriniń biri, hadısshi ári faqıh ǵulama Abdýlla ıbn Múbárakqa bir kisi kelip, balasynyń minez-qulqynyń nasharlyǵyna shaǵymdanypty. Abdýlla ıbn Múbárak odan surapty: "Oǵan teris tilek aıtyp pa ediń?" Ákesi: "Iá", dep jaýap beripti. Sonda Abdýlla ıbn Múbárak oǵan: "Ony buzǵan sensiń!" - degen eken, - dep jazylǵan "Bala tárbıesindegi 25 qatelik" kitabynda.