Sársenbiden beısenbige qaraǵan túni Almatynyń Medeý aýdanyna qarasty «Taý samaly» shaǵynaýdany, Olımpııskaıa kóshesiniń boıynda tehnogendik topyraqtyń laılanýy saldarynan laı kóshkini júrdi. Apattan taý bókterinde ornalasqan eki birdeı jeke turǵyn úı zardap shegip, ishinde tórt turǵyny bar bir úı topyraq astynda qaldy. О́kinishke qaraı, tilsiz jaýdan bir otbasynyń músheleri túgel qaza tapty.
Málim bolǵandaı, apattan zardap shekken shańyraqta 1980 jáne 1984 jyly týǵan erli zaıyptylar men olardyń 2007 jyly dúnıege kelgen egiz uly bolǵan. Olardy izdestirý sharalary birneshe saǵatqa sozyldy. Qutqarý jumysyna «Qazseldenqorǵaý» memlekettik mekemesi, Almaty qalasy «109 qutqarý qyzmeti», respýblıkalyq jedel-qutqarý jasaǵy, Tótenshe jaǵdaı departamentiniń jedel járdem brıgadasy, Medeý aýdany ákimdiginen 160 adam jáne 32 tehnıka jumyldy. Jaqyn mańdaǵy úılerdiń turǵyndary №47 orta mektepke evakýasııalanyp,olardyń keıbiri óz erikterimen týystarynyń úıine ketken. Marqumdardyń týystary men kórshilerine shuǵyl psıhologııalyq kómek kórsetildi.
Oqıǵa ornyna kelgen qala ákimi Erbolat Dosaev búlingen ǵımarattardy aralap, shuǵyl kóshpeli keńes ótkizdi. Ákimniń tapsyrmasymen oqıǵanyń sebepterin tekserý jáne laı kóshkini saldaryn joıýǵa arnaıy top quryldy. Tereńdigi 1 metrge jýyq juqa topyraq qabatynyń jolaǵy, aýyrlyq kúshiniń áserinen erigen qarmen qanyǵyp, baýraıdan tómen qaraı syrǵyǵan.
«Qutqarýshylar qıraǵan úıde turǵan otbasy múshelerin izdestirý jumystaryn aıaqtady. Qaıǵyly oqıǵa tórt adamnyń ómirin qıyp otyr. Qaza bolǵan jandardyń jaqyndaryna qaıǵyra kóńil aıtamyn. Otbasynyń barlyq múshesin jerleýdi uıymdastyrý úshin kómek kórsetiledi. Qazirgi ýaqytta elden tys jerde oqıtyn qaza bolǵan otbasynyń úlken ulyna bilim alýǵa jáne kelgen soń ómir súrýine materıaldyq qoldaý kórsetiledi», dedi Erbolat Dosaev.
Almaty qalasy men Almaty oblysynyń taýly aýdandarynda mundaı qaýipti oryndar az emes. Keıbir aýmaqtardaǵy turǵyn úıler tipti taýdyń qııa betkeıinde ornalasqan. Qıraǵan úıge jaqyn mańda turatyn Aıshagúl Ermanova, munda 10 jyl buryn osyndaı oqıǵadan bir ájeı qaıtys bolǵanyn, qystyń sońy men kóktem aılarynda jandaryn shúberekke túıip otyratynyn jetkizdi.
Medeý aýdanynyń ákimi Erkebulan Orazalın kóshkin bolǵan «Taý Samaly» shaǵyn aýdanyndaǵy ınjenerlik jelilerdiń jaǵdaıyna baılanysty túsinikteme berdi.
«Qazir «Taý-Samaly» shaǵyn aýdanynda jeke sektordyń kommýnıkasııalarǵa qosylýy retsiz ári qaýipti. Jeke sektordaǵy kóptegen taratý jelisi standarttarǵa sáıkes kelmeıdi. Jaqyn arada bul máseleni sheshý úshin biz ótken jyldan bastap taratý jelilerin salý jobasyn ázirleýge kirisken bolatynbyz. Biz «Balqash» sý kózin kórsettik, jańa uńǵymalar – bul birinshi kezeń. Ekinshi kezeń – taratý jelilerin júrgizý jáne sý qubyrymen qatar káriz jelilerin salý, óıtkeni taýly jerlerde septıkterdi paıdalanatyn jeke úıler qaýipsiz emes», deıdi E.Orazalın.
ALMATY