Shulyq

Ildebaıǵa kireberistegi hatshy qyz:

– Sizge Pyqyp Asabas degen bireý kirmeı ket­peımin dep otyr, – degende, búıregi búlk ete qaldy. Pyqyp – atalas ta teteles inisi. Sháıpaý, minezi tik, tek tótesinen tartady. Mar­qum ákesi mu­nyń eseıip er jetýi ǵana emes, bile bilse, osy la­ýa­zymdy qyzmettiń «qyzyl kirpishin» qalap ber­gen kisi. Balasynyń joly bolmaı júnjip jú­re­tinin biletin. Ne de bolsa, qoldan kelse kómek­­teskendi paryz sanap, qabyldaǵandy jón kórdi.

Aman-esendikti kelte qaıyryp, inisine:

– Haliń qalaı? – dep resmı túrde tótesinen tartyp edi:

– Tesik shulyq kıip júrmin... – dep ol da tótesinen dúńk etkizdi.

Ildebaı biraýyz sózben bedireıip otyrǵan inisine sál-pál aqylyn aıtqan bolyp edi:

–  Berse qolynan, bermese jolynan... Aq­sha men bıliktiń zamany, qol jetse, urys­ta turys joq! – dep kújireıe kúńk etip kósem­sigen soń:

– Bir qyzmetke qoıaıyn, baıqarsyń, – dep shyǵaryp saldy.

 Inisi kelesi kelgende de:

–Haliń qalaı? – dep suraǵyn kelte qaıyryp edi:

– Shulyǵym bútindeldi, eski kólikpen te­peńdep júrip jatqan jaıym bar... – dep qana jaýap qatty.

Oǵan baıqaý kerektigin, pále aıaqasty ekendigin eskertip, onysyna: «Zamanyna qaraı – adamy», «Zamanyń túlki bolsa, tazy bolyp shal» degen mándegi tirkesterdi estip: «Pále qaıda deme, aıaq astynda», degen bolyp, taǵy bir búri bar qyzmetti buıyrtty.

 Inisi kelmeı ketedi, kelse, tegin kelmeıtinin biletin basy, bul jolǵy bas suǵýynda:

– E, haliń neshik? – dep suraǵyndaǵy sózdi ózgertken boldy.

– Kóligime kóńilim tolady. Tek tar úıden tynysym tarylyp júrgeni... – dep, burynǵy buqa minez joq, aıtaryna sál-pál «qan jú­girip» jýasyǵandaı.

Ildekeń ishteı munysyna shúkirlik etip, kózdep júrgen beldi qyzmetin belden basyp berdi de jiberdi.

Joǵalyp ketip, kelesi kelgeninde:

– Qalaısyń? – dep synaı qarady.

– Úıdi úlkeıtkenmin, kelinińiz rıza! Tek pálekettiń aıtary bite me, jer alyp, el sııaq­ty saıajaıda turǵanǵa ne jetsin deıdi, – dep kúmil­jigen boldy.

Qoldan keleri qyzmet, taǵy da bedeldi salyp, belden basýǵa týra keldi.

Sodan inisi izim-qaıym, betin aýlaq... endi-endi izdeý salaıyn dep júrgeninde, ózi emes, kelin kelip otyr.

Birden:

– Inim qalaı? – dep edi, kúmiljı bir paraq qaǵazdy aldyna qoıdy. Kóz júgirtip edi: «Túrmedemin... shulyq toqyp júrmin... toqyp bastap, jaqynda shulyq sehynyń sheberine kóterildim. Kóke, kómektesińiz, adal eńbektiń ne ekenin uqtym. Shyqqan boıda bar kásipti tárk etip, tek shulyq toqýmen aınalysamyn», dep kelte qaıyrypty.

Berik SADYR