Qys eldiń apshysyn qýyra keldi. Qańtardyń basynda qaqaǵan aıaz aptalap turyp aldy. Kóksheniń kóp kóli sirese qatty. Mamandardyń aıtýyna qaraǵanda, kók muzdyń qalyńdyǵy keı jerde 70-80 santımetr bolsa, dalalyq kólderde metrge jýyq.
Sý astyndaǵy tirshilikti saqtap qalý úshin ottegi qajet. Syrma boran qar ataýlyny qamys ishine qýyp tyqqan. Dala tósindegi kók muz qursanǵan kólge jetýdiń ózi ońaı-ospaq sharýa emes. Barmaı taǵy bolmaıdy. Taıyz kólderdegi balyq ataýly tunshyǵyp, baýdaı túsýi ábden yqtımal. Qazir óńirdegi 600-ge jýyq sý aıdynynyń elýge taıaýynda aerasııa jumysy júrgizilip jatyr.
Qys jańa túskende bul jumysty júrgizýge bolmaıtyn edi. Qaımyjyqtaı muz qaýipti. Qalyńdyǵy 40-50 santımetrge jetýi kerek, áıtpese tehnıkany kótere almaıdy. Qazir bul qaýiptiń qateri seıilgen. Kez kelgen kóldegi muzdyń qalyńdyǵy 70 santımetrden kem emes. Sý aıdyndaryn paıdalanýshylar aýamen qorektendirý jumysyna kirisip ketti. Bul ıgi is kógerip kóktem kelgenshe jalǵasady.
– Taıaýda ǵana Zerendi aýdanyndaǵy Qumdykólge baryp keldik. Eki motopompamen jumys istedik. Qazir árbir aýdandaǵy ınspektor kólderdi baqylaýǵa alyp, qadaǵalap jatyr. Kól muzyn oıyp, oıyqqa qamys tyǵyp, sý astyna aýa ótetindeı áreket jasap jatyrmyz, – deıdi «Esil» oblysaralyq basseındik balyq sharýashylyǵy ınspeksııasynyń bólim basshysy Nurlan Keýlimjaev.
Mamandardyń aıtýyna qaraǵanda, sý astyndaǵy ósimdikterge kúnniń nury jetkilikti deńgeıde túspegendikten, otteginiń ornyna kómirtegi kóbirek bólinedi eken. Balyq bitkenniń erkin tynys alýyna bóget. Sondyqtan Kókshetaý óńirindegi sý aıdyndarynyń negizi taıyz, dalalyq kólder ekenin eskere otyryp, ottegimen qorektendirý qajettigi týyndaıdy. Bul iske kól jaǵalaı qonǵan kópshilik te atsalyssa quba-qup.
Aqmola oblysy