Atyraý oblysynda kıik sanyn retteý sharasy 16 qańtarda bastalǵan. Arada 10 kún ótkende Mahambet aýdanynyń aýmaǵynan 38 kıiktiń ushasy tabyldy.
Oblystyq máslıhatynyń depýtaty Baqyt Qametovtiń aıtýynsha, kıiktiń ushalary Mahambet aýdanyndaǵy Tańdaı aýyldyq okrýgine qaraıtyn Qalmaqty eldi mekeniniń tusynda jatqany anyqtalǵan. Dalada jatqan kıiktiń keıbiri baýyzdalǵan. Keıbiriniń qarny jarylǵan. Máslıhat depýtaty 26 qańtarda kıiktiń úıilip jatqan ushasy túsirilgen vıdeony áleýmettik jelidegi paraqshasyna júktedi.
«Beınejazba 26 qańtar saǵat 19:30-da túsirilgen. Tandaı selolyq okrýgine qarasty Qalmaqty eldi mekeninde 38 kıiktiń óleksesi tabyldy. Barlyǵynyń múıizin kesip alǵan. Ishki qurylysy joq. Sharýagerlerdiń aıtýynsha, 25 qańtarda orman jáne janýarlar dúnıesin qorǵaý mekemesiniń memlekettik qyzmetkerleri jáne ańshylary atyp ketken. Polısııa qylmysty tirkep, zańdy shara qoldanady», dep habarlady Baqyt Qametov. Orman sharýashylyǵy jáne janýarlar dúnıesi komıtetiniń málimetine súıensek, atalǵan derek Mahambet aýdandyq ishki ister bólimi tergeý júrgizip jatyr. Is materıaldary Qylmystyq kodekstiń 339-babynyń 2-bóligimen tirkelgen.
«Kıik sanyn retteý «Ohotzooprom» ınspektorlarynyń tikeleı qatysýymen júzege asady. Bekitilgen algorıtmge sáıkes retteý nátıjesinde alynǵan kıik ushalary mindetti túrde asqazan-ishek jolyn alyp tastap, ishki músheleri, basy jáne terisimen veterınarlyq baqylaý úshin et kombınatyna jiberiledi. Mal dárigerleri ushalardy qarap baıqaǵan soń veterınarııalyq anyqtama beredi. Kıik múıizderi belgilengen talaptardy saqtaı otyryp, «Ohotzooprom» derıvattarǵa esep júrgizetin jaýapty qyzmetkeriniń, aýmaqtyq orman sharýashylyǵy jəne janýarlar dúnıesi ınspeksııasy memlekettik ınspektorlarynyń baqylaýymen bólinedi. Keıinnen «Ohotzooprom» saqtaýǵa jiberý úshin mindetti túrde tańbalaýǵa jatady», dep habarlady komıtetten.
Atyraý oblysy