Memlekettik qyzmetterdi kórsetý – memleket pen qoǵamnyń ózara is-qımylynyń quramdas bólikteriniń biri. Adam dúnıege kelgennen bastap memlekettik kórsetiletin qyzmettermen tyǵyz baılanysta bolady. Búginde azamattardyń ýaqytyn únemdeý, ákimshilik kedergiler men qaǵazbastylyqty joıý maqsatynda elektrondy kórsetiletin qyzmetterdiń úlesi artyp keledi.
Oblysta 395 memlekettik qyzmet túri kórsetiledi. О́tken jyly qyzmet berýshi mekemeler tarapynan 6 mln-nan astam qyzmet kórsetilse, sonyń 5 mln 151 myńǵa jýyǵy jergilikti atqarýshy organdar, 871 myńnan astamy aýmaqtyq memlekettik organdar úlesinde.
Elektrondy túrde qyzmetter alý kórsetkishi 2022 jyly 97,8 paıyzdy qurasa, byltyr 98,2 paıyzǵa jetti. «Qazaqstan Respýblıkasynyń Memlekettik kórsetiletin qyzmetter týraly» zańyna sáıkes kez kelgen tulǵa memlekettik kórsetiletin qyzmetti alýǵa jáne qyzmetti berýshiniń sheshimderine, áreketterine (áreketsizdigine) belgilengen tártippen shaǵymdanýǵa quqyly.
Sondyqtan memlekettik qyzmetterdi kórsetetin organdar úshin óz qyzmetiniń sapasyn arttyrý, jeke jáne zańdy tulǵalardyń quqyqtarynyń saqtalýy basty qaǵıda bolýǵa tıis. Degenmen zańnamanyń buzylýyna jol beretinder de joq emes. О́tken jyly Memlekettik qyzmet isteri agenttiginiń Qyzylorda oblysy boıynsha departamentiniń qaraýyna 57 shaǵym túsken. Onyń 19-yna departament tarapynan jospardan tys tekserý taǵaıyndalsa, 22-si tıisti mekemelerge joldandy. Iesiniń ótinish hatymen 16 shaǵym toqtatyldy. Jospardan tys tekserýler nátıjesinde 3 azamattyń ýáji dáleldenip, quqyǵy qalpyna keltirildi. Shaǵymdardyń basym bóligi jer ýchaskeleriniń tabystalýyna jáne áleýmettik qamsyzdandyrý salasyna qatysty.
«Eldi mekender sheginde obekti salý úshin jer ýchaskelerin berý» memlekettik qyzmetin kórsetýde oblys ortalyǵy turǵynynyń shaǵymy negizinde Qyzylorda qalasy ákimi apparatyna, qalalyq sáýlet jáne qala qurylysy, aýyl sharýashylyǵy jáne jer qatynastary bólimderine jospardan tys tekserý júrgizildi. Tekserý barysynda qalalyq sáýlet jáne qala qurylysy bólimi tarapynan kelisýshi organdarǵa qyzmet alýshynyń qujattaryn 111 kúnge keshiktirip joldap, memlekettik qyzmetti kórsetý tártibiniń buzylǵany anyqtalsa, qalalyq jer qatynastary bólimi tıisti sheshim jobasyn qala ákimi apparatyna joldamaǵany belgili bolyp otyr. Memlekettik organdar qyzmet kórsetý merzimin saqtamaı, azamattardyń quqyǵyn buzǵan.
Atalǵan fakti boıynsha qalalyq sáýlet jáne qala qurylysy bóliminiń jaýapty mamanyna tártiptik jaza qoldanylsa, qalalyq aýyl sharýashylyǵy jáne jer qatynastary bóliminiń basshysy ákimshilik jaýapkershilikke tartyldy. Tekserý nátıjesinde departament tarapynan engizilgen usynym negizinde qyzmet alýshynyń quqyqtary qalpyna keltirildi.
2022 jyldyń shilde aıynan bastap azamattarǵa memlekettik qyzmetterdi kórsetý barysynda oryn alǵan buzýshylyqtardy anyqtaý fýnksııasy agenttikke berildi. Osy kezeńnen bastap departament tarapynan memlekettik organdardyń aqparattyq júıelerine qashyqtan monıtorıng jumystary júrgizilip jatyr. О́tken jyly qashyqtan baqylaý tártibin buzǵan 132 derek anyqtaldy. Osyǵan baılanysty memlekettik organdardyń basshylaryna 21 ákimshilik hattama toltyrylyp, bıýdjet kirisine 724 500 teńge aıyppul óndirildi.
Qashyqtan monıtorıng júrgizý barysynda Jalaǵash aýdanynyń Buqarbaı aýyldyq okrýgi ákimi apparaty tarapynan «Jer ýchaskesiniń nysanaly maqsatyn ózgertý» memlekettik qyzmetin kórsetý merzimi buzylǵany anyqtaldy. Departament tarapynan shuǵyl túrde Jalaǵash aýdany ákimdigine eskertpe hat joldanyp, qyzmet kórsetý merzimderin saqtamaı, qaýlyny 5 jumys kúnine keshiktirip usynǵany úshin aýyldyq okrýg ákimine ákimshilik aıyppul salyndy jáne aýyldyq okrýg ákimi apparatynyń bas mamanyna tártiptik jaza berildi.
Byltyr qashyqtan monıtorıng jasaý jumystarynyń nátıjesinde 6 qyzmet alýshynyń buzylǵan quqyǵy qalpyna keltirildi.
Erlegen MEŃDALIEV,
Memlekettik qyzmet isteri agenttigi Qyzylorda oblysy boıynsha departamentiniń basshysy