Ult keskindeme óneriniń tarlanbozy Ábilhan Qasteevtiń týǵanyna bıyl 120 jyl tolyp otyr. Ulttyq beıneleý óneri dese, Ábilhan Qasteevtiń esimin brend dep bilemiz. Halyq sýretshisiniń «Kógildir kóılekti qyz», «Amangeldi sarbazdary», «Qalyńdyq» sekildi ózge de týyndylaryn zamandastary, maıtalman mamandar joǵary baǵalaǵany anyq.
Beıneleý óneri alybynyń mereıtoıyna oraı Taraz qalalyq «Anaǵa taǵzym» ortalyǵynyń uıytqy bolýymen is-shara ótti. Qasteev murasyn halyq arasynda keńinen nasıhattaý maqsatynda uıymdastyrylǵan is-sharaǵa jergilikti sýretshiler qatysyp, Brodskıı stýdııasynda sheberligin ushtaǵan óner ıesiniń týyndylary týraly oılaryn ortaǵa saldy.
«Ýaqytynda Ábilhan Qasteevti óz kózimmen kórip, qaıtalanbas tulǵanyń qasynda boldym. Dańqty sýretshiniń galereıasynan ákemniń parovoz júrgizip bara jatqan kartınasyn tamashalap, keremet sezimdi bastan keshirgen edim», dedi eńbek ardageri Gúlbahram Aqylova ótken shaqqa kóz júgirtip.
Is-shara barysynda sóz alǵan rejısser Qarjaýbaı Sydyqnazarov pen Qazaqstan Sýretshiler odaǵy oblystyq fılıalynyń jetekshisi Aıdarhan Sıhaev Ábilhan Qasteev kartınalarynyń ereksheligi týraly tolǵamdy oılaryn bólisti.
«Ásilinde sýretshi mamandyǵyna qyzyqqan kez kelgen jas Almatydaǵy Qasteev galereıasyn kózben kórip, onyń qoltańbasynyń ereksheligin júrekpen sezinýi kerek. Ábilhan murasynyń artyqshylyǵyn túsingen jas qana myqty maman bola alady», dedi A.Sıhaev is-shara barysynda sóılegen sózinde.
Jas talanttardyń beıneleý ónerine qyzyǵýshylyǵyn arttyrý, Qasteev murasyn el ishinde nasıhattaý maqsatynda uıymdastyrylǵan kezdesýde ózge de mamandar pikirlerin ortaǵa saldy. О́nerpazdardyń ádemi ánderimen ádiptelgen is-sharanyń joǵary deńgeıde ótýine D.Qonaev atyndaǵy balalar jáne jasóspirimder kitaphanasy ujymy atsalysty. Kitaphanashylar uıymdastyrǵan kórmeni tamashalaǵan kópshilik Ábilhan Qasteev týyndylarymen tereńirek tanysty.
TARAZ