Almaty tehnologııalyq ýnıversıtetiniń 3-kýrs stýdenti Nurdáýlet Baıhanov jańa qosymsha qurastyrdy. О́zi de UBT tapsyrǵan ol jańa qosymshasyn UNAI dep ataǵan.
Jańashyldyqqa jany qumar Nurdáýlet Baıhanov munaıly óńirdegi orta mektepti bitirgen. Ol qurastyrǵan qosymshanyń ereksheligi kóp. Birinshiden, UBT suraqtaryna daıyndalýǵa, ekinshiden, saraptama jasaýǵa, úshinshiden, jeke jáne toptyq saıys ótkizýge, tórtinshiden, ony tegin paıdalanýǵa bolady.
«UBT-ǵa daıyndalýdyń júıkege salmaq túsiretinin bilemin. Sol sebepten, bul qosymsha «100 myń oqýshyǵa qalaı kómektese alamyz?» degen izdenisten týyndady. Maqsatym – bıyl 100 myń túlektiń osy baǵdarlamany paıdalanyp, memlekettik grantpen joǵary oqý oryndaryna túsýine kómektesý. Ár túlektiń bilimin jetildirýine kishkene bolsa da úlesimdi qosqym keldi», deıdi Nurdáýlet Baıhanov.
Onyń pikirinshe, bilikti maman ataný úshin aldymen UBT synaǵynan joǵary ball alý qajet. Jastar memlekettik grantpen joǵary bilim alyp, maman atansa, elimizdiń álemdik deńgeıge tanylýyna úlesin qosar edi.
«Shoqan Ýálıhanovtyń «Halyqtyń kemeline kelip, órkendep, ósýi úshin eń aldymen azattyq pen bilim qajet» degenin udaıy jadymda ustap júremin. Men de elimniń damýyna úlesimdi qosyp, halqymyzdyń jaǵdaıy jaqsarǵanyn qalaımyn», deıdi jańashyl stýdent.
Talapty jastyń aıtýynsha, UNAI qosymshasyn paıdalaný úshin App Store jáne Play market baǵdarlamasy arqyly júkteý kerek. Qosymshaǵa tirkelgen soń, bastapqy bettegi «Oınaý» batyrmasy arqyly birden UBT-ǵa daıyndyqty bastaýǵa bolady. Al arnaıy nusqaýlyqty unai.kz Instagram nemese TikTok paraqshasynan kórýge múmkindik bar.
Atyraý oblysy