Fılologııa ǵylymdarynyń doktory, professor, synshy, jazýshy Myrzabek Dúısenov ómiriniń sońǵy 15 jylynda turǵan Almaty qalasyndaǵy Sh.Ýálıhanov kóshesindegi 104-úıge memorıaldy taqta ornatyldy.
Tanymal tulǵany eske alýǵa jınalǵan qaýym birtýar ǵalymnyń ǵylymǵa, ádebıetke sińirgen eńbegi haqynda oı tolǵady.
M.Áýezov atyndaǵy Ádebıet jáne óner ınstıtýtynda uzaq jyl qyzmet etken Myrzabek Dúısenov – kórkem proza, syn, ádebıettaný salalarynda birdeı eńbek etken qarymdy qalamger. Ol kishi ǵylymı, aǵa ǵylymı qyzmetkerden Jambyltaný bóliminiń meńgerýshisine deıin jaýapty qyzmet atqardy. Ál-Farabı atyndaǵy QazUÝ-da bilim alǵan ǵalym kezinde Muhtar Áýezovtiń jetekshiligimen aspırantýraǵa qabyldanǵan. Ábdildá Tájibaev, Ázilhan Nurshaıyqovtaı halqymyzdyń dara perzentterimen de úzeńgiles bolyp, ádebıet maıdanynda ter tókti.
Jıynda Qazaqstannyń eńbek sińirgen qaıratkerleri, jazýshy Sultanáli Balǵabaev pen ǵalym Serik Negımov Myrzabek Dúısenovtiń jaısań minezin, tereń izdenisin eske alyp, onyń ádebı kásipke degen adaldyǵyn, áripteske degen meıirimin áńgimeledi. Ǵalymnyń ǵylymı qaǵıdaty men ult tanymyn kótergen derekti prozasyn atap ótti.
Qazaqstan Jazýshylar odaǵy tóraǵasynyń orynbasary Baýyrjan Jaqyp qazaq ádebıettanýynyń damýyna ólsheýsiz eńbek sińirgen Zeınolla Qabdolov, Serik Qırabaev, Tursynbek Kákishev sekildi tulǵalardyń qatarynda Myrzabek Dúısenovtiń de turǵanyn aıtty. Búginde ǵalymnyń artynda óshpes murasy, baǵa jetpes eńbekteri qaldy.
ALMATY