Mindetti áleýmettik medısınalyq saqtandyrý júıesi jyldan-jylǵa rettelip keledi degenmen áli de bolsa kemshin tustary bar. Júıege aı saıyn jarnasyn aýdaryp, saqtandyrý paketinde kórsetilgen tıisti medısınalyq kómekti ala almaǵandar sózimizge dálel. Jýyrda Májilis depýtaty Ashat Aımaǵambetov osyndaı keleńsiz jaıttarǵa muǵalimderdiń tap keletinin aıtty.
Máseleniń jaı-japsaryn Májilis depýtaty Ashat Aımaǵambetov áleýmettik jelidegi paraqshasyna jarııalady.
«Muǵalimderdiń kóbi MÁMS-ke turaqty jarna tólep otyrsa da mindetti medısınalyq saqtandyrý júıesi aıasynda medısınalyq kómek alýǵa kelgende kedergige tap bolyp jatyr. Munyń sebebi – jazda, úsh aılyq demalys kezinde keıbir býhgalterler jalaqyny jáne MÁMS boıynsha tıisti jarnany bir aýdarymmen aýdarady. Bul óz kezeginde MÁMS-tiń bıýrokratııalyq tıimsizdiginen muǵalimderdi saqtandyrylǵan azamattar degen mártebesinen aıyryp, medısınalyq kómektiń qoljetimsizdigine alyp keldi. Biz buǵan deıin Densaýlyq saqtaý mınıstrligine osyny tez arada retteý týraly talap qoıǵanbyz. Bolashaqta bul máseleni sheshemiz dep senemin», deıdi depýtat.
Jyl boıy MÁMS-ke jarnasyn tólep kelgen muǵalimder oqý jyly bastalarda osyndaı kedergige tap bolady eken. Sebebi bir – jarna tólemegen. Bir qyzyǵy, birer apta buryn, ıaǵnı jelidegi jazbaǵa deıin áleýmettik medısınalyq saqtandyrý qory uzaqmerzimdi demalys kezinde qyzmetkerlerdi saqtandyrýǵa kepildik berý úshin júıege taǵy ózgerister engiziletinin jarııalaǵan. Habarlamadan áleýmettik medısınalyq saqtandyrý qorynda beıindik normatıvtik-quqyqtyq aktige tolyqtyrý engizý usynylǵanyn bildik. Bul – uzaqmerzimdi demalys kezinde qyzmetkerlerdiń MÁMS-ten shyǵyp qalmaýyna septesedi eken.
Negizi «Mindetti áleýmettik medısınalyq saqtandyrý týraly» zańǵa sáıkes jumys berýshi aı saıyn áleýmettik medısınalyq saqtandyrýǵa qyzmetkeri úshin jarna tóleýge tıis. Al eger júıege bir aı aýdarym túspese, ol qyzmetker MÁMS júıesindegi «saqtandyrylǵan» mártebesinen aıyrylady. Saldarynan elimizdiń birneshe óńirinde muǵalimder, taý-ken kásiporyndarynyń qyzmetkerleri jáne vahtalyq ádispen jumys isteıtin keıbir mamandar osy keleńsizdikke urynady eken.
Kóptiń jadynda júrgen máseleni sheshýdi oılastyrǵan Áleýmettik medısınalyq saqtandyrý qory byltyr jeltoqsanda Densaýlyq saqtaý mınıstriniń MÁMS-ke aýdarymdardy nemese jarnalardy aýdarý erejeleri men merzimderi týraly buıryqqa tolyqtyrý engizýge bastamashy bolypty. Munda áleýmettik medısınalyq saqtandyrý qory qujattyń mátininde aqyly eńbek demalysy kezeńindegi tabysty esepteý kezinde aýdarymdar men jarnalar demalys kúnderiniń sanyna barabar eseptelgen kezeńder boıynsha bólek aýdarylatynyn naqtylaýdy usynǵan. Qazir qordyń usynysy ýákiletti ortalyq – memlekettik organdardyń qaraýynda eken. Endi kóp uzamaı osy tolyqtyrýdy qabyldaý týraly oń sheshim shyqsa, uzaqmerzimdi demalystan keıin «saqtandyrý» mártebesinen qaǵylǵan muǵalimderdiń ǵana emes, basqa birneshe sala mamanynyń máselesi sheshiledi-mys.