Senattyń Halyqaralyq qatynastar, qorǵanys jáne qaýipsizdik komıtetiniń depýtattary elimizdiń Ulttyq qorǵanys ýnıversıtetinde bolyp, jastarǵa áskerı-patrıottyq tárbıe berý máselelerin talqylady.
Komıtet tóraǵasy Andreı Lýkın Memleket basshysy Qasym-Jomart Toqaev áskerı bilim berýdi jetildirý jáne áskerı qyzmetshilerdiń qazaqstandyq patrıotızmin qalyptastyrý máselesine erekshe nazar aýdaryp otyratynyn atap ótti.
«Patrıottyq tárbıe máselesi barlyq memlekettik organdarda osy sala boıynsha keshendi sharalardy júzege asyrýdy kózdeıdi. Alaıda mekemearalyq ózara is-qımyl men júıeli tásildiń bolmaýy, bilim berý úderisinde tárbıe jumysy mańyzynyń tómendeýi jáne oń nátıjeni kótermeleý men esepke alý tetiginiń bolmaýǵa tıisti nátıje bermeıdi jáne áskerı-patrıottyq tárbıe júıesin odan ári jetildirýdi talap etedi», dedi senator A.Lýkın.
Ýnıversıtet basshysy, general-maıor Asqar Mustabekov óz kezeginde parlamentshilerge joǵary oqý ornynyń jumysy men jastarǵa áskerı-patrıottyq tárbıe berý jónindegi 2025 jylǵa deıin eseptelgen baǵdarlamany iske asyrý týraly aıtyp berdi. Onda memlekettik qurylymdar men azamattyq qoǵamnyń jastardyń áskerı qyzmetke ynta-jigerin qalyptastyrý men áskerge shaqyrylǵanǵa deıingi daıyndyqtyń aýqymdy máselelerin sheshýdegi ózara is-qımyldyń negizi qalanǵan.
Ýnıversıtet ujymy kezdesý barysynda osy saladaǵy zańnamany jetildirýge qatysty máselelerdi kóterdi. Senatorlar óz kezeginde sońǵy jyldary áskerı qyzmetshilerdiń áleýmettik qorǵalýyn jaqsartý jáne jastardyń áskerı boryshyn óteýge ynta-yqylasyn arttyrý jóninde birqatar zańnamalyq akti qabyldanǵany týraly aıtyp berdi. Sondaı-aq búgingi tańda Parlamentte áskerı-patrıottyq tárbıe máseleleri jónindegi zań jobasy boıynsha belsendi jumys júrgizilip jatqanyn habarlady.