Osydan 10 jyl buryn Joǵarǵy sot resmı saıtynda onlaın servısterge jáne sot organdarynyń qyzmet kórsetýlerine qoljetimdiliktiń jalǵyz terezesi – «Sot kabıneti» elektrondyq jobasyn iske qosty. Arnaıy silteme arqyly ótseńiz, sot kabınetimen jumys jónindegi anyqtamada osy elektrondy servısti qalaı paıdalanýǵa bolatyny retimen kórsetilgen.
«Sot kabıneti» – sot organdaryna aryz, ótinish, shaǵym men ótinish hattardy, sondaı-aq hattardy jiberýge arnalǵan servıs. Ol úshin sotqa júginýshi aldymen HQO-dan elektrondyq sıfrlyq qoltańba alýy qajet. Portalǵa ótkennen keıin aryz berýshi elektrondyq qyzmet kórsetýdiń ishinen ózine kerek bóligin ońaı tańdaı alady. Qaǵazsyz elektrondyq qujat aınalymy arqyly sot qujattaryn jáne isterdi izdeýge, memlekettik bajdy onlaın túrde tóleýge, isti qaraý barysyn qadaǵalaýǵa bolady.
«Sot kabıneti» servısiniń qaǵaz túrinen ereksheligi talap qoıý úshin aryz berýshi portalǵa tıisti derekterdi qamtıtyn elektrondyq talap nysanyn toltyra alady. Elektrondyq qujat nysanynda talap jáne qujattardyń basqa da kóshirmeleri qosa tirkeledi. Aryzdyń atrıbýttaryn engizgennen keıin, qajet bolǵan jaǵdaıda talap berýshi memlekettik baj salyǵyn tóleı alady. Osydan keıin elektrondyq talap qoıýǵa aryz berýshiniń elektrondyq sandyq qoltańbasymen qol qoıylyp, Biryńǵaı avtomattandyrylǵan aqparattyq-taldaý júıesi ortalyǵyna jiberiledi.
«Sot kabıneti» elektrondyq júıesi arqyly joldanǵan talap qoıýlar boıynsha iste taraptar sotqa kelmeı-aq, osy júıege kirý arqyly is qujattary, materıaldar, sot shyǵarǵan qujattar, sot hattamasyn berý týraly aryz, hattamaǵa eskertý-aryzdy berýge jáne sot aktilerimen tanysyp, kóshirmelerin alý quqyǵyna ıe bolady.
Elektrondyq sıfrlyq qoltańbany qoldana otyryp, elektrondyq qadaǵalaý is júrgizýine qoljetimdilikti qamtamasyz etetin «Sot kabıneti» – qaǵaz qujat aınalymynan birtindep bas tartyp, sottarda elektrondyq sot isin júrgizýdiń jańa satysyna kóshý degendi ańǵartady.
Aıan ALTYNBAEV,
Jalaǵash aýdandyq sotynyń ákimshi basshysy
Qyzylorda oblysy