Batys Qazaqstan oblysynda polısııa sýpermarketten 6 mıllıon teńge urlaǵan qaraqshyny ustady, dep habarlaıdy Egemen.kz Polisia.kz-ke silteme jasap.
Bórli aýdandyq polısııa bóliminiń krımınaldyq polısııa qyzmetkerleri jedel izdestirip, 25 jastaǵy kúdiktini ustady. Ol Aqsaı qalasyndaǵy sýpermarketterdiń birine qaraqshylyq shabýyl jasap, aqsha urlaǵan.
«Kúdikti saýda ornynyń ákimshisin ańdyp, aýlaǵa shyqqan kezde uryp-soǵyp, kiltin tartyp alyp, dabyl sıgnalızasııasyn óshirip, sýpermarketke kirgen. Ol jerden 6 mıllıon teńgege jýyq aptalyq tabysty jymqyryp ketken», delingen habarlamada.
Tonaý faktisi boıynsha qylmystyq is qozǵaldy. Tergeý amaldary júrgizilip jatyr. Kúdikti ýaqytsha ustaý ızolıatoryna qamaldy.