Elimizdegi kıeli jerler shyraqshylardyń kún kóris kózine, baqsy-balgerlerdiń ordasyna aınalǵan. Senator Darhan Qydyráli Úkimet basshysyna joldaǵan depýtattyq saýalynda osy máseleni kóterip, rýhanı eskertkishterdi qorǵaýǵa aıryqsha kóńil bólý qajet ekenin aıtty, dep habarlaıdy Egemen.kz.
«Qazaqstandaǵy 25 myń eskertkishtiń jartysyna jýyǵy ornalasqan Mańǵystaý óńirinde muralardyń kóbi tarıhı-mádenı eskertkishter tizimine engizilgenimen, olardy qaraýǵa maman jetispeıdi. Mádenı qabattardy «qara arheologtar» men buzaqylar túrli vandalızm arqyly búldirip jatyr. Jeti jurt kóshken mańǵaz mekendegi qorymdardyń qorshaý aýmaǵyna zańsyz qurylystar, beıitter salynyp ketken. Olarǵa qarsy qoldanystaǵy «Tarıhı mádenı murany qorǵaý jáne paıdalaný» zańy qaýqarsyz. Aıyppuly nebári 30 myń teńge ǵana! Ulytaýda Joshy kesenesiniń janyna áldebir qaltaly jaqynyn jerlep ketken, endi nysandy IýNESKO tizimine engizý múmkin bolmaı tur», dedi D.Qydyráli.
Senator kıeli jerler shyraqshylardyń kún kóris kózine, baqsy-balgerlerdiń ordasyna aınalǵanyn aıtty. Onyń sózinshe olardyń keıbiri tarıhı oryndy saqtap otyrǵanymen, arnaıy bilim, ereje-qaǵıdattary men standarty joq.
«Tipti ultqa uran bolǵan Beket ata – jekeniń menshiginde! Pir Beket – bir qazaqtyń aıbary emes, ol – bar qazaqtyń baıraǵy! Halyqtyń rýhanı qalpyn qalyptastyrǵan mundaı tulǵalar mekeni qundylyq retinde memleket qaraýynda bolýy tıis! Sondyqtan elimizde rýhanı eskertkishterdi qorǵaýǵa aıryqsha kóńil bólý qajet», dedi depýtat.