M.V.Lomonosov atyndaǵy Máskeý memlekettik ýnıversıtetiniń Qazaqstan fılıaly bıylǵy ǵylymı keńestiń alǵashqy otyrysynda qazaq tilin oqytýdy jetildirý máselesin talqylady. Onda jańa ustanymnyń biri retinde QazTest júıesine negizdelgen ádistemeni engizý qarastyryldy.
– Bizdiń oqý ornynan 2001 jyldan beri 2 300-den astam joǵary bilikti maman túlep ushty. Sondyqtan biz Qazaqstan tarıhy men qazaq tilin oqyp-úırený men oqytý ádistemesin jetildirýge erekshe kóńil bólemiz. Qazaq tilin bilý deńgeıin arttyrý maqsatynda fılıalda ony jetildirý baǵdarlamasy ázirlendi, – dedi fılıal dırektory Aleksandr Sıdorovıch.
Qazaq tilin oqytýdy jetildirý úshin QazTest júıesi negizinde memlekettik tildi meńgerý deńgeıin obektıvti baǵalap, bolashaq túlekterge odan ári memlekettik qyzmetke ornalasýy jáne elimizdegi joǵary oqý oryndaryndaǵy magıstratýra men doktorantýrada bilim alýyna múmkindik týǵyzatyn ádistemeni engizý máselesi jolǵa qoıyldy. Talapqa sáıkes, olardyń qazaq tili boıynsha bilimine aǵymdaǵy baqylaýdy rettilikpen qadaǵalaıtyn QazTest júıesi engiziledi.
Baqylaý tyńdalym, leksıkalyq jáne grammatıkalyq qurylym, oqylym, jazylym bloktary boıynsha júrgiziledi. Búginde barlyq oqý baǵytynda birinshi jáne ekinshi kýrs stýdentteri úshin baqylaýdy oryndaý júıesin engizýdiń alǵashqy nátıjesi bar. Stýdentterdiń deni memlekettik tildi meńgerýdiń negizgi jáne orta deńgeıin kórsetti.
Ǵylymı keńeste oqý úderisiniń tájirıbelik baǵytyn kúsheıtý maqsatynda aralyq baqylaý emtıhanymen birdeı deńgeıdegi QazTest sertıfıkaty bolýyn esepke alýdy engizý kerek degen sheshim qabyldandy. Sonymen birge fılıaldyń kitaphana qoryn qazaq tilindegi kórkem jáne oqý ádebıetterimen tolyqtyrý, «Iskerlik qazaq tili» jáne «Akademııalyq jazý» baǵdarlamasy boıynsha fakýltatıvtik sabaq uıymdastyrý, sondaı-aq oqytý úderisinde paıdalaný úshin ınnovasııalyq elektrondyq oqýlyqty ázirleý jáne daıyndaý qolǵa alynady.
Qazaq tiliniń oqý-ádistemelik bazasyn qalyptastyrý, jetildirý jáne stýdentterdiń memlekettik tildi oqyp-úırenýge yntasyn arttyrý úshin respýblıkalyq, oblystyq, qalalyq qazaq tilin oqytý jáne qazaq tili oqytýshylaryn qaıta daıarlaý ortalyqtarymen, aıtalyq, QazTest, Ulttyq testileý ortalyǵy, «Til-qazyna» ulttyq ǵylymı-praktıkalyq ortalyǵy jáne Y.Altynsarın atyndaǵy Ulttyq bilim akademııasymen yntymaqtastyqty keńeıtýdi josparlap otyr.