Anda-sanda jolaı úlken úıge tumsyq suǵatyn ádetimmen sonda taban tirep, jeńgeme:
– Aǵam bir jaqqa ketip pe edi? – dep edim:
– Qaıda bolýshy edi, demalys bolsa bitti – monshasyna túsip «terlep-tepshıdi» emes pe! Arǵy bettegi kórshiniń múk basqan májentopaı monshasynda. Tili kúrmelip, kózi qylılanbaı turǵanynda baryp alyp kel! Kórshi de kókezý bireý. Sıraǵy shyqqan sıdıǵan neme, – dedi tyjyrynyp.
Kelesi kelgenimde jeńgem «Aǵam qaıda?» degizbedi.
– Túsken soń monshanyń da táýirleýine barǵan jón be dep qaldym. Aǵań ótkende bajasymen basqa bir táýirleý monshaǵa baryp kelip edi, ózi de, sózi de túzý. Bajasy ekeýiniń tirlikti qozǵaǵan áńgimeleriniń shetin estip «Áp, bárekeldi!» dep shı syndyrdym. Barǵan monshalary da táýirleý, onda bastalyp, úıde jalǵasyn taýyp jatqan áńgimeleri de kóńilge qonady, – dedi jyly júzben.
Taǵy bir jeksenbide qarashańyraqqa bara qalyp edim, jeńgem:
– Aǵań monshada emes, ortalyqtaǵy ońasha saýnada. О́tkende soǵan jeteǵabyl bireýine baryp baǵy jandy... Ondaǵylar osaldar emes, tanysa kele, bilise kele kóp nárseden kózi ashylyp kósemsip keldi. Baǵy jandy deıtinim, surasa kele, bilise kele bireýi aǵańdy aqshasy táp-táýir qyzmetke de kirgizip jiberdi, – dep jelpingeni bar.
Keleside aǵama esik aldynda amandasyp qaldym. Asyǵys, qoldorbasynan «terlep-tepshýge» ketip bara jatqanyn túsindim.
Úıge kirip úndemesem de jeńgem:
– Kim bilgen, bilsek te monsha jaryqtyqtyń neshe túri bolatynynan maqurym ekenbiz. Búgin onyń eń myqtysyna bir-aq tartty. О́tkendegi ońasha saýnaǵa barǵan saıyn baǵy janyp... Negizi, táp-táýirlermen tanys-bilis bolyp, óresi órge ozyp, órisi keńidi desem bolady. Áriden aıtqan áńgimesine, sondaǵylardyń demeýimen bel býyp kirisken kórim isine rızamyn. Saýlyǵyn tilep, buryndary aıyna bir baratyn «bazaryna» jeti saıyn jelpindirip otyratyn boldym, – dedi kóz janary jaınap.
Birde jeńgeme dúken mańynda jolyǵa qalyp edim:
– Erteń jeksenbi emes pe, aǵańnyń anda aparatyndaryn alyp júrmin. Aǵań erledi, Alla jazsa qalaýy bolyp, degenimizge jetermiz! – dep jónele berdi.
Barmaǵaly biraz bolǵan, úlken úıge tumsyq suǵyp edim, jeńgemniń qabaǵy qatý, óńi órt sóndirgendeı:
– Keldiń be! – dep kirjıdi. – Búk-shik monsha túbine jetti! Bir krýtoıdyń krýginde bolatyn. Solarmen shomylyp jatyp, olardyń bir keris-urysyna tap kelip, qarsylasy urda-jyq ıt eken, bulardy bý bólmesinde bas kóz demeı sabap ólimshi etip... Qan-josa qalpy aýrýhanaǵa túsip, áreń-páreń aıyqqan bolyp, qoltyqtap kóterip keshe úıge ákelgenbiz. Qaıteıik, omyrtqadan opyrylyp júrip-turýdan qalypty... Jýynyp-shaıynsyn dep qolarbamen arǵy bettegi kórshiniń múk basqan májentopaı monshasyna aparǵanmyn... Sıraǵy shyqqan kókezý kórshimen iship tili kúrmelip, kózi qylılanbaı turǵanynda baryp alyp kel! – dedi tyjyrynyp.
Berik SADYR