16-25 aqpan aralyǵynda Ońtústik Koreıada ústel tennısinen komandalyq álem chempıonatynyń jalaýy jelbireıdi. Osy básekeler barysynda Olımpııa oıyndarynyń lısenzııalary sarapqa salynatyndyqtan tórtkúl dúnıeniń myqtylary Pýsanda baq synaýǵa bel býdy.
Sporttyń bul túrinen álemdik doda sonaý 1926 jyldan beri uıymdastyrylyp keledi. Alǵashqy jarys Londondaǵy «Memorıel Holl» arenasynda ótti. Bul básekelerde eń kóp júlde alǵan – Qytaı quramasy. Erler men áıelderdiń qosa eseptegende Qytaı eliniń ókilderi 407 márte (145 altyn+103 kúmis+159 qola) jeńis tuǵyryna kóterildi. Ekinshi jáne úshinshi oryndy Majarstan (68+58.5+75.5) men Japonııa (48+36+73) ózara bólisip tur. Tórtinshi jáne besinshi oryndarda – Chehııa (28+34.5+59) men Rýmynııa (16.5+10.5+19). Atalǵan jarysta barlyǵy 20 memlekettiń ǵana ánurany shyrqalyp, 32 eldiń týy kókte jelbiredi.
Ústel tennısinen básekelestiktiń kúshtiligi sonshalyq kezinde 15 respýblıkanyń basyn biriktirgen KSRO sportshylarynyń nebári 14 júldeni oljalaýǵa kúsh-jigeri jetti. Onyń úsheýi – altyn, tórteýi – kúmis jáne jeteýi – qola. Al el sportshylary týraly aıtpaı-aq qoısaq ta bolady. 30 jyldan asa ýaqyt aralyǵynda jerlesterimiz birde-bir júldege qol jetkize almady. Jalpy, keńes odaǵy taraǵannan keıin burynǵy «baýyrlas» respýblıkalar arasynan tek Belarýstiń ústel tennısshileri ǵana álem chempıonatynda tabysty óner kórsetti. Olar úsh júlde aldy. О́zgelerdiń qorjyny – bos.
Alǵashqy kezderi uıymdastyrylǵan dúnıejúzilik dodalarda favorıtter almasyp turdy. Erler jaıynda aıtar bolsaq, alǵashqy 30 jylda birqatar eldiń ókilderi jeńis tuǵyrynyń eń bıik satysyna alma-kezek kóterildi. Jekelegen saıysta majarstandyq Vıkto Barna bes ret (1930, 1932-1935 jyldary) bas júldeni oljalady. Aýstrııalyq Rıhard Bergman tórt márte (1937, 1939, 1948, 1950) teńdessiz dep tanyldy. HH ǵasyrdyń elýinshi jyldarynyń aıaǵynda Qytaı sportshylary julqynyp shyqty. 1959 jyly Jýn Gotýan óz komandasynyń qorjynyna alǵashqy altyndy saldy. Chjýan Szedýn 1961, 1963 jáne 1965 jyldary qatarynan úsh ret chempıon atandy. Sodan keıin Qytaı elinen bólek, Shvesııa, Fransııa jáne Aýstrııanyń qoly júırik jigitteri aldyńǵy lekten kórindi. Al 2005 jyldan beri 10 jarystyń jalaýy jelbirese, sonyń barlyǵynda da Qytaıdyń ústel tennısshileriniń mereıi ústem boldy.
Áıelderdiń jaǵdaıy da shamamen solaı. Alǵashqy bes jarysty majarstandyq Marııa Mednıanskı (1926-1931) utty. Anna Shıposh (1932-1933) eki ret, Gızella Farkash (1947-1949) úsh ret shashasyna shań juqtyrmady. Chehoslovakııalyq Marııa Kettnerova (1933, 1935), amerıkalyq Rýt Aarons (1936, 1937) jáne aýstrııalyq Gertrýda Prıtsı (1937, 1938) qos jarystyń jeńimpazy atandy. Elýinshi jyldardyń alǵashqy jartysynda Andjelıka Rozıaný atoı saldy. Rýmynııanyń maqtanyshy bes márte (1950-1955) dara shyqty. Qytaı qyzdary alǵashqy altynǵa 1961 jyly qol jetkizdi. Al 1995 jyldan bastap olar da chempıondyq tájdi eshkimge bermedi. Atalǵan eldiń burymdylary qatarynan 15 jarysta qarsylas shaq keltirgen joq.
Keıingi álem chempıonaty 2023 jyly OAR-dyń Dýrban qalasynda uıymdastyryldy. Erler básekesinde barlyq tórt júldeni de Qytaı quramasy oljalady: Fan Chjendýn – altyn, Van Chýsın – kúmis jáne Lıan Szınkýn men Ma Lýn – qola. Áıelder saıysynda Sýn Insha bas júlde alsa, Chen Men kúmispen kúpteldi. Chen Sıntýn men japonııalyq Hına Haıata qolaǵa qol sozdy.
Al komandalyq jarys jaıynda aıtar bolsaq, kúni búginge deıin Qytaı qarsylas shydatpaı júr. Máselen, bul eldiń erler quramasy 2001 jyldan beri uıymdastyrylǵan sońǵy 10 dodada dara shyqty. Barlyǵy 22 jarysta jeńimpaz atandy. Majarstan 10 márte jáne Chehoslovakııa alty ret bas júldeni oljalady. Bul memleketterdiń órenderi HH ǵasyrdyń alǵashqy jartysynda atoı saldy. 1954-1969 jyldar aralyǵynda japondar jeti dúrkin álem chempıony atansa, 1973-2000 jyldary shvedterdiń alty ret asyǵy alshysynan tústi. AQSh (1937) pen Anglııanyń (1953) ústel tennısshileri bir-bir retten top jardy.
Qytaıdyń áıelder quramasynyń kórsetkishi odan da jaqsy. 1965-2023 jyldar aralyǵynda 28 márte jalaýy jelbiregen jarystyń 23-inde Qytaı eliniń arýlary altynnan alqa taqty. Sondaı-aq Japonııa – 8 (1957-1962 jyldar aralyǵy), Rýmynııa – 5 (1950-1956), Chehoslovakııa – 3 (1935, 1936, 1938), AQSh (1937, 1949), Germanııa (1933, 1939), Ońtústik Koreıa (1973, 1993) – 2 jáne KSRO (1969) men Sıngapýr (2010) 1 retten teńdessiz dep tanyldy.
Keıingi jyldary ústel tennısi Qazaqstanda qarqyndy damyp keledi. Oǵan dálel – jerlesterimizdiń túrli halyqaralyq jarysta júlde alýy. Álemdik reıtıngtegi jaǵdaıymyz da jaman emes. Erler arasynda Kırıll Gerasımenko 47-oryndy ıelenip tur. Bul – kelmeske ketken KSRO quramyndaǵy memleketter arasyndaǵy eń úzdik kórsetkish. Jas daryn Alan Qurmanǵalıev 210-oryndy enshilegen. Aıdos Kenjeǵulov 276-orynǵa turaqtasa, Sanjar Jubanov 280-satyǵa jaıǵasty. Al áıelderdiń jaǵdaıy asa máz emes. Elimizdiń eń úzdik oıynshylary mynadaı oryndarǵa taban tiredi: Sarbınoz Mirqadyrova – 206, Záýresh Aqasheva – 232, Anastasııa Lavrova – 248 jáne Angelına Romanovskaıa – 327.
Sońǵy daıarlyǵyn Qazaqstannyń ústel tennısshileri Almatyda pysyqtady. Olar Ázerbaıjan quramasymen birlesken oqý-jattyǵý jıynyn ótkizdi. Sportshylardy Elmıra Álıeva, Dmıtrıı Pereverzev, Evgenıı Tımchenko jáne Dmıtrıı Levenko syndy mamandar baptady. Al komandanyń serkeleri shetelde daıarlandy. Atap aıtsaq, Kırıll Gerasımenko men Anastasııa Lavrova Germanııada jáne Alan Kurmanǵalıev Qytaıda jattyqty.