AQSh-tyń «Gracenote» saraptama agenttigi bıyl 26 shilde men 11 tamyz aralyǵynda Parıjde ótetin XXXIII jazǵy Olımpııa oıyndarynda qaı memlekettiń qansha júldege qol jetkizetinin joramaldaǵan eken.
Atalǵan agenttik sarapshylarynyń pikirinshe, jalpykomandalyq esepte AQSh quramasy jeke-dara kósh bastaıdy. Fransııanyń bas shaharynda amerıkalyqtar 129 júldege qol jetkizedi. Onyń 37-si – altyn, 46-sy – kúmis jáne 46-sy – qola. Ekinshi oryndy Qytaı oljalaıdy. Qytaı eliniń ókilderi 85 (35+28+22) medaldi moınynda jarqyratady. Úshinshi satyǵa jarys qojaıyndary (26+16+11) jaıǵasady. Sondaı-aq TOP-5 komandanyń qataryna Ulybrıtanııa (17+22+25) men Japonııa (17+15+24) qosylady.
«Gracenote» uıymynyń sarapshylary Qazaqstan quramasy Parıj Olımpıadasyn 30-orynmen qorytyndylaıdy dep boljap otyr. Otandastarymyzdyń 2 altyn, 1 kúmis jáne 6 qolany qanaǵat tutady-mys. Barlyǵy – 9 júlde. Bul rette biz irgeles О́zbekstannan da qalyp qoıady ekenbiz. «Ala taqııaly» aǵaıyndarymyz tórtjyldyqtyń basty dodasynda 13 medaldi (3+3+7) qorjynǵa salady.
Salystyrmaly túrde alsaq, 2021 jyly Tokıoda alaýy tutanǵan Olımpııa oıyndarynda AQSh (39+41+33), Qytaı (38+32+18) jáne Japonııa (27+14+17) quramalary aldyńǵy lekten kórindi. Tórtinshi orynǵa Ulybrıtanııa (22+21+22) taban tiredi. О́z eliniń olımpıadalyq komıtetiniń týy astynda óner kórsetken Reseıdiń sportshylary (20+28+33) úzdik bestikti túıindedi. Iá, sol jarysta Qazaqstan quramasynyń tym súreńsiz óner kórsetkeni ras. Kúnshyǵys eline attanǵan 93 órenimiz 19 sport túri boıynsha baq synady. О́kinishke qaraı, jer-jahannyń jampozdary jınalǵan jarysta nebári 8 qolany qanaǵat tutyp, 83-orynda qalyp qoıdy. Japonııanyń astanasynda bizge qaraǵanda ózbekterdiń qarqyny kúshti boldy. Olar 3 altyn men 2 qolany ıelenip, jalpy esepte 32-oryndy enshiledi.