Syrdyń syn-qaterine ázirlik

Syrdaǵy ázirlikti kórýge jumys saparymen kelgen Tótenshe jaǵdaılar mınıstri Shyńǵys Árinov pen oblys ákimi Nurlybek Nálibaev Qyzylorda sý torabyna baryp, ózendegi sý deń­geıin baqylady. Bıylǵy qys jyly bolyp, arnada ótken jeltoqsan aıynyń alǵashqy onkúndiginde ǵana muz ustasa bastaǵan. Keıinnen ózenniń ońtústik bóligi erigenmen, soltústik jaǵy áli siresip jatyr.

Osy kúni Aral, Qazaly, Qarmaq­shy, Jalaǵash, Syrdarııa aýdandary men Qyzylorda qalasy mańynda muz tolyqtaı ustasyp tur. Shıeli aýdanynyń Jólek eldi mekeni tusyn­da da muz bar. Jańaqorǵan aýma­ǵyn­daǵy ózen beti áldeqashan erigen.

Sý basý qaýpi bar aýmaqtar kúsh-quraldary jetkilikti mekemelerge bekitilgen, osy kúni 364 arnaıy tehnıka jáne 1 102 adam daıyn tur. Sý tasqynyna qarsy jasaqtalǵan ma­terıaldyq-tehnıkalyq qorda 117,9 tonna janar-jaǵarmaı, 139 902 dana qap jáne basqa da materıaldar bar. Aıtqan jerden aýlaq, biraq tasqyn qaýpi týyndaı qalsa halyqty kóshirý pýnktteri de daıyn tur. Oblys aýmaǵynda 59 evakýasııalyq jınaqtaý jáne 69 evakýasııalyq qabyldaý orny bar. Jergilikti atqarýshy organ­dar men sý sharýashylyǵy maman­dary táý­lik boıy kezekshilik uıym­dasty­rady.

Tótenshe jaǵdaılar mınıstri Qyzylorda oblysynda qaýipsizdik sharalary barlyq talapqa saı úıles­tirilgenin atap ótti. Oblysqa sapary barysynda sala basshysy jer­gilik­ti órt sóndirý bólimderin aralap, Tótenshe jaǵdaılar mınıstrligi aýmaq­tyq bólimshelerin materıaldyq-tehnıkalyq jaraqtandyrý barysy­men tanysty. «2021-2023 jyldar­ǵa arnalǵan TJM aýmaqtyq bólimshe­leri men vedom­stvolyq baǵynys­ty memlekettik meke­melerin materıal­dyq-tehnıkalyq jaraqtan­dyrý týraly» jol kartasy aıasynda ob­lystyq tótenshe jaǵdaılar depar­­tamentine 2021-2023 jyldar ara­lyǵynda oblys bıýdjetinen 664,5 mln teńge qarjy bólinip, oǵan 74 mate­rıal­dyq-tehnıkalyq qural-jab­dyq, ózge de qa­jetti quraldar alyndy. Budan bólek, jergilikti bıýdjet qarajaty esebinen lızıngpen 14 órt sóndirý av­tomobılin satyp alýǵa «О́nerkásipti damytý qory» aksıonerlik qoǵamymen kelisimshart jasalǵan. Bul tehnıkalar aldaǵy sáýir aıynda jetkiziledi.

Sala mamandary osyǵan deıin Aral aýdany Qamystybas kólindegi sýda qutqarý stansasy ǵımaratynyń sanı­tarlyq jáne órtke qarsy nor­malarǵa sáıkes emestigin talaı márte kó­tergen bolatyn. Ǵımaratta súńgýir­lerdi daıarlaý jáne táýlik boıy kezek­shilik atqarýǵa jaǵdaı jasalma­ǵandyǵy bylaı tursyn, arnaıy tehnıka men jabdyqtardy saqtaýǵa arnalǵan úı-jaı bolmaǵan edi.

Osydan eki jyl buryn jergilikti bıýdjetten 54,3 mln teńge bóli­nip, qutqarýshylarǵa arnalǵan quras­tyrmaly-jınalmaly modýldi úı satyp alyndy.

Qyzylorda