Venada Slovenııanyń tóraǵalyǵymen 17 dostas el tobynyń ekinshi kezdesýi ótti. Bular – óńirlik toptarǵa kirmeıtin, tıisinshe Atom energııasy jónindegi halyqaralyq agenttiktiń basqarýshy organdaryna saılaý quqyǵynan aıyrylǵan elder.
Qazaqstan SIM baspasóz qyzmeti habarlaǵandaı, kezdesý Atom energııasy jónindegi halyqaralyq agenttigi (AEHA) Basqarýshylar keńesiniń naýryz aıyndaǵy sessııasynyń aldynda ótti.
Dostas elder tobynyń negizgi mindeti – óńirlik toptarǵa kirmeıtin jáne tıisinshe agenttiktiń basshylyq organdaryna saılaý quqyǵynan aıyrylǵan AEHA-ǵa múshe memleketterdi tıisti óńirlik toptarǵa kirgizý. Toptyń mandaty 2023 jylǵy qyrkúıekte Qazaqstannyń bastamasymen usynylǵan jáne basym kópshilik daýyspen qabyldanǵan AEHA Bas konferensııasynyń qararymen bekitildi.
Is-sharaǵa AQSh, RF, QHR, Kanada, Ulybrıtanııa, Eýropalyq odaq elderi, Aýstralııa, Túrkııa, Japonııa, Ońtústik Koreıa, Kýveıt, Ázerbaıjan, Ońtústik Afrıka jáne basqa da múshe memleketterdiń dıplomatııalyq mıssııalarynyń basshylary qatysty. Qatysýshylar Qazaqstan, Izraıl, Nepal, Bahreın, Ortalyq Azııa jáne Azııa – Tynyq muhıty óńiriniń elderin qosa alǵanda 17 múshe memleketti tıisti óńirlik toptarǵa ádil jáne jyldam kirgizýdiń yqtımal krıterııleri men qaǵıdattaryn talqylady.
О́z sózinde Qazaqstannyń Turaqty ókili Muhtar Tileýberdi múshe memleketterdiń óńirlik toptardaǵy músheligin ilgeriletýmen aınalysatyn 8 óńirlik toptyń árqaısysynda beıtarap elderdiń arasynan «fasılıtatorlardy» taǵaıyndaý týraly usynys jasady. Bul usynys Dostas elder tobynyń arasynda keń qoldaý tapty.
Dıplomatııalyq mıssııalardyń basshylary óz sózinde Qazaqstan men Slovenııaǵa AEHA-da egemendik teńdikti qalpyna keltirý máselesin belsendi ilgeriletkeni úshin alǵys aıtty. Qazaqstannyń atom energııasyn beıbit maqsatta paıdalaný salasyndaǵy belsendi qyzmeti, onyń ishinde Aýstralııamen birlese otyryp, bıyl 20–24 mamyrda AEHA-nyń Iаdrolyq qaýipsizdik jónindegi halyqaralyq konferensııasyna (ICONS-2024) tóraǵalyq etý boıynsha mıssııasy erekshe atalyp ótti.