Kerekýdegi aýyldardyń birinde 120 oqýshyǵa laıyqtalǵan jańa bilim berý uıasy ashyldy. Mektep zamanaýı jabdyqtarmen, STEM-zerthanamen, IT, robottehnıka jáne 3D-modeldeý synyptarymen jabdyqtalǵan.
Pavlodar aýdanynyń Sychevka aýylynda jańa mektep esigin aıqara ashty. Ǵımarat 1975 jyly salynǵan, apattyq jaǵdaıda turǵan eski bilim berý oshaǵynyń ornynda boı kóterdi. Zamanaýı úlgidegi mekteptiń saltanatty ashylý rásimine qatysqan Pavlodar oblysynyń ákimi Asaıyn Baıhanov oqýshylarǵa jaqsy bilim alyp, zor jetistikterge jetýge tilektestik bildirdi.
– Memleket basshysy «Elimizdiń damýy jas urpaqqa baılanysty» dep atap ótken bolatyn. Biz oqý oryndarynyń ınfraqurylymyn jańartýǵa kóp kóńil bólýdemiz. Sychevka aýylyndaǵy mektep – aımaǵymyz boıynsha apatty jaǵdaıdaǵy eski ǵımarattardyń ornyna salynǵan úshinshi bilim ordasy. Biz osy jyly da basqa eldi mekenderde mektepter men balabaqshalar salýdy jalǵastyramyz. Bul balalarymyz úshin aýylda jaıly jaǵdaı jasaýdyń taǵy bir qadamy bolmaq, – dedi ákim.
Sonymen qatar ol ERG tobynyń aksıonerlerine de alǵysyn bildirdi. Jańa mekteptiń qurylysy ERG men Pavlodar oblysynyń ákimdigi arasyndaǵy memorandým aıasynda júrgizildi. Jobaǵa salynǵan ınvestısııa 1,08 mlrd teńgeni qurady. Aýmaǵy 1 498 sharshy metrdi alyp jatqan eki qabatty ǵımaratta led-dıspleıi bar májilis zaly, sportzaly, ashana jáne kitaphana bar. Sıfrly mıkroskoptar men vırtýaldy-sıfrlyq zerthana satyp alyndy. Sondaı-aq mektepte «Erketaı» shaǵyn ortalyǵy men mektepke deıingi bilim berý ortalyǵy ashyldy.
Pavlodar oblysy