Bishkekte Qaýipsizdik keńesteri hatshylarynyń, ulttyq qaýipsizdik jónindegi keńesshileriniń Aýǵanstan máselesi boıynsha altynshy óńirlik dıalogi ótti. Jıynǵa Qazaqstan Respýblıkasy Qaýipsizdik Keńesiniń hatshysy Ǵızat Nurdáýletov qatysty.
Is-sharaǵa qatysýshylar Aýǵanstandaǵy jaǵdaıdyń damýy jáne onyń óńirlik qaýipsizdikke áseri jóninde pikir almasty.
Ǵızat Nurdáýletov Aýǵan aýmaǵyndaǵy jaǵdaıdy aıqyndaıtyn birqatar faktordy atap ótti. Osy rette negizgi qaýip burynǵysha terrorızm men ekstremızmniń, zańsyz esirtki aınalymynyń taralýyna, qarý-jaraq satýǵa jáne zańsyz kóshi-qonǵa baılanysty bolyp otyr.
Transshekaralyq sýdy paıdalaný máselesine de erekshe nazar aýdaryldy. Qaýipsizdik Keńesiniń hatshysy osy qaýip-qaterlerdi barynsha azaıtý úshin Aýǵanstandaǵy jaǵdaıdy, onyń ishinde áleýmettik-ekonomıkalyq jaǵdaıdy turaqtandyrý isine kómektesýge baǵyttalǵan birlesken jumys qajet ekenin aıtty.