L.N.Gýmılev atyndaǵy Eýrazııa ulttyq ýnıversıteti otandyq joǵary oqý oryndary arasynda álem turǵyndaryn energııany únemdeýge jáne tabıǵı resýrstardy saqtaýǵa shaqyratyn «M’illumino di Meno» ekologııalyq aksııasyna birinshi bolyp qatysyp, jahandyq bastamaǵa ún qosty.
Aksııa aıasynda ýnıversıtettiń stýdentter úıinde jaryq óshirildi. Sóıtip, atalǵan joǵary oqý orny tabıǵı resýrstarǵa janashyrlyqpen qaraıtyn jahandyq bastamany qoldaıtynyn kórsetti.
«Memleket basshysy Dúnıejúzilik klımattyq sammıtte sóılegen sózinde bizdiń elimiz bolashaq urpaq úshin qorshaǵan ortany saqtaýǵa baǵyttalǵan naqty sharalar qabyldaý jónindegi BUU-nyń úndeýin qoldaıtynyn atap ótti. Qazaqstan aımaqta birinshi bolyp Parıj kelisimin ratıfıkasııalap, 2060 jylǵa deıin kómirtegi beıtaraptyǵy strategııasyn qabyldaǵany belgili. Biz osy mańyzdy bastamany qoldap, ǵylymı jáne bilim berý jobalaryn júzege asyryp kelemiz. Ǵalymdarymyz qorshaǵan ortany qorǵaýǵa baǵyttalǵan zertteýler júrgizip otyr. Oqý barysynda da stýdentterdi tabıǵat pen tabıǵı resýrstarǵa jaýapkershilikpen qaraýǵa baýlımyz», dedi ýnıversıtet rektory Erlan Sydyqov.
Bastamaǵa Stýdentter úıinde turatyn bilim alýshylar belsendi qatysty. Olar bólmelerindegi jaryq pen elektr quralyn 1 mınýtqa sóndirdi. Ýnıversıtettegi mehanıka-matematıka fakýltetiniń 1-kýrs stýdenti Ulpan Tursynbek energııany tıimdi jumsaý jáne únemdeý óte qajet ekenin jetkizdi.
«Qazir kúndelikti turmysta energııa tutynýdyń jappaı ósimine baılanysty energııany únemdeý máselesi alǵashqy qatardan oryn alyp otyr. Árıne, oǵan ózimiz sebepkermiz. Ásirese bul másele iri qalada anyq baıqalady. Búgin biz elektr qýatyn únemdeýge baǵyttalǵan álemdik aksııaǵa qatysyp otyrmyz. Menińshe, bul – jańa ózgeristerge jol ashatyn úlken betburys. Eger osy bastamanyń arqasynda 100 adamnyń 10-y ózine oı túıip, elektr energııasyn durys qoldaný týraly túsinik qalyptastyrsa, bul elimizdiń ekonomıkasyna da, halyqtyń ál-aýqatyna da orasan yqpalyn tıgizeri sózsiz», dedi ol.