Almatyda aq jeleńdi jandardyń biliktiligi men jedeldigin synaǵan oqys oqıǵa oryn aldy. Almaty qalalyq Balalarǵa shuǵyl medısınalyq kómek kórsetý ortalyǵynyń reanımasııalyq brıgadasyna aýyr jaǵdaıǵa tap kelgen eki jasar balaǵa ózderi barýǵa týra keldi.
Úı men jumys arasyndaǵy qarbalas ýaqytta jedel járdem brıgadasy tunshyǵyp jatqan balany balalar aýrýhanasyna alyp bara jatady. Sábıdiń jaǵdaıy tipti nasharlaı bastaǵanda dárigerler ýaqytty bosqa ótkizbeı, jaqyn jerdegi Qazybek bı kóshesindegi Qalalyq jedel shuǵyl kómek kórsetý aýrýhanasyna (QJShKA) aparýdy uıǵarady.
Bala birden osy aýrýhananyń jansaqtaý bólimine jatqyzylyp, reanımatologter Geımlıh aılasyn qoldanyp, ishtegi bóten zatty alyp tastaýǵa birneshe ret árekettengenimen, ókinishke qaraı, nátıje bolmaǵan. QJShKA dırektorynyń orynbasary Ermek Jeldibaevtyń aıtýynsha, ujym kishkentaı naýqastyń ómirin saqtaýda tyǵyryqqa tirelgen. Eresekter aýrýhanasynda balalarǵa arnalǵan bronhoskoptyń bolmaýyna baılanysty oǵan bronhoskopııa jasaý múmkin emes edi. Alaıda balanyń jaǵdaıy nasharlap, satýrasııasy tómendep, kógere bastaǵan soń reanımatologter Nurlan Rsalıev, Mamyrjan Iýldashev jáne hırýrg Baqtııar Galıev shuǵyl túrde ıntýbasııa jasady. Intýbasııa kezinde balanyń tynys joldary ashylyp, osydan keıin ǵana balalar aýrýhanasynan dárigerler jetkenshe onyń jaǵdaıyn turaqtandyrýǵa múmkindik týdy.
Balalarǵa shuǵyl medısınalyq kómek kórsetý ortalyǵynyń (BShMKO) mamandary kelgennen keıin bronhoskopııanyń kómegimen balanyń tynys jolyna turyp qalǵan burshaq alyndy. Kishkentaı ǵana pasıenttiń jaǵdaıy QJShKA jansaqtaý bóliminde birneshe saǵattan soń qalpyna kele bastaǵannan keıin, odan ári qaraı emdeý úshin atalǵan ortalyqqa jetkizildi.
«Burshaqty shyǵaryp alý ońaı emes, bul negizinen bronhoskopııa kómegimen jasalady. Balalar aýrýhanasynyń mamandary kelgenge deıin bizdiń dárigerler der kezinde áreket jasady. Sodan keıin BShMKO dárigerleri «eresekter» aýrýhanasy jaǵdaıynda kásibı túrde jasaǵan bronhoskopııanyń arqasynda bala aman qaldy. Bárimiz sábıge alańdap, onyń jaǵdaıyn jiti qadaǵalap otyrdyq, qazir úıge shyǵarylǵanyn estip qýanyp jatyrmyz», deıdi dáriger Ermek Jeldibaev.
Balalar aýrýhanasy qabyldaý bóliminiń meńgerýshisi Meıirjan Qurmanalıev mundaı eresekter men balalar aýrýhanalary mamandary shuǵyl túrde naýqasty qosyla qutqaratyn oqıǵalar jylyna eki-úsh ret qaıtalanatynyn aıtady.
«BShMKO qabyldaý bólimine 103-ten «Naýqas 2 jasta, aspırasııalyq sındrom, reanımasııalyq brıgadany daıyndańyz» degen qońyraý tústi. Qabyldaý bóliminde 7 mamannan turatyn brıgada kútip otyrǵan. Shamamen 30 mınýt ótti, bala áli joq: «Bizge jetkizýge ýaqyty bolmady ma?», «Bala aman ba?» degen úreı týyp, 103-ke ózimiz qońyraý shaldyq. Sóıtsek, olar naýqasty jaqyn mańdaǵy basqa aýrýhanaǵa aparýdy uıǵarǵan eken. Ýaqyt ótip jatty. Komanda tez jınalyp, 15 mınýt ishinde QJShKA-ǵa jetti. Kelgennen keıin bizdiń top bronhoskopııa jasap, tynys alý joldarynan burshaqty shyǵaryp tastady. Eki aýrýhananyń jedel áreketiniń arqasynda sábı aman qaldy», deıdi M.Qurmanalıev.
Balalar aýrýhanasynyń dárigerleri bıyl bir jarym aıdyń ishinde tynys joldarynda bógde zat bar 10 naýqasty aman alyp qalǵanyn aıta ketken jón. Bul pasıentterdiń barlyǵy – 1 men 3 jas aralyǵyndaǵy balalar.
ALMATY