Kóleńkeli kásipten tapqan tabystyń bári zańsyz ekeni daýsyz. Biraq budan bas tartpaıtyndar áli de bar. Olar quqyq qorǵaý organdarynan aılasyn asyra almasa da, aıylyn jııýǵa asyǵar emes.
Atyraý oblysy boıynsha ekonomıkalyq tergep-tekserý departamentiniń basqarma basshysy Bekbolat Ánesovtiń málimetine súıensek, keıingi úsh jylda osyndaı sanattaǵy 85 quqyq buzýshylyq tirkelip otyr. Osy kezeńde departamenttiń tergeý óndirisinde 145 qylmystyq is bolǵan. Onyń 107 isti tergeý aıaqtalyp, 59-y sotqa joldanǵan. Al 48 qylmystyq is qysqartylǵan. Qylmystyq isterden keltirilgen shyǵyn kólemi 10,9 mlrd teńgeni qurap otyr. Shyǵynnyń 6,1 mlrd teńgesi memleketke qaıtarylyp, 9,4 mlrd teńgeniń múlki tárkilendi. Jalpy qaıtarylǵan soma – 15,5 mlrd teńge.
Kóleńkeli kásipti qolǵa alǵandardyń arasynda zańsyz oıyn bıznesin uıymdastyrýshylar da bar. Úsh jylda osy iske qatysty 7 qylmystyq quqyq buzýshylyq tirkeldi. Onyń ishinde eki derek ótken jyly anyqtalǵan.
Máselen, Qurmanǵazy aýdanynda turatyn áıel tórt jyl buryn jeke kásipker retinde tirkelgen. Biraq paıdakúnemdik maqsatynda ıeligindegi ǵımaratta zańsyz oıyn bıznesin uıymdastyryp, býkmekerlik keńse ashqan. Zańǵa qaıshy áreketin iske asyrý úshin birneshe teledıdar ornatyp, kompıýterlik qurylǵylarǵa ınternet jelisi boıynsha «Mohio Keno Bet» qumar oıynyn translıasııalaıtyn «Chashier Mohio» baǵdarlamalyq ónimin jabdyqtaǵan. Tipti qumar oıyndy saıtqa júktegeni anyqtaldy. Agenttiktiń jergilikti departament qyzmetkerleri 2023 jyly 6 qańtarda jedel izdestirý is-sharasyn júrgizip, quqyq buzýshynyń zańǵa qaıshy áreketin áshkereledi. Al sot kásipkerdiń bas bostandyǵyn bir jyl merzimge shekteýge úkim shyǵardy.
«Atyraý qalasynda 2023 jyldyń mamyr aıynan osy kezge deıin zańsyz oıyn bıznesin uıymdastyrý deregi anyqtaldy. Munda poker oıyny oınatylǵan nysanǵa tintý júrgizildi. Mekenjaıdan 440 dana poker fıshkasy, 294 dana oıyn kartasy, oıyn tósenishteri, uıaly telefondar men 2 mln 660 myń teńge aqsha qarajaty, basqa da is úshin mańyzdy zattar alyndy», deıdi Bekbolat Ánesov.
«Magazın ý doma» jelisiniń ókili, kásipker Lázzat Dosmaǵambetovanyń aıtýynsha, kóleńkeli kásiptiń kesirinen shaǵyn jáne orta bıznestiń ıeleri zardap shegip otyr. Túrli sebeppen shaǵyn dúkenderge tekserý júrgiziledi.
«Biraq iri kóterme saýdamen aınalysatyndardy eshkim teksermeıdi. Olar qajetti qujaty joq taýarlardy shaǵyn dúkenderge jetkizedi. Shaǵyn dúkender mundaı taýarlardy alýǵa májbúr bolady. Tekserý kezinde jaýapkershilikti dúken ıeleri kóteredi», deıdi L.Dosmaǵambetova.
Prezıdenttiń «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» 2022 jylǵy 14 naýryzdaǵy Jarlyǵy bar. Soǵan sáıkes elimizden qolma-qol shetel valıýtasyn jáne (nemese) aqsha quraldaryn 10 myń dollardyń balamasynan asatyn jáne Ulttyq banktiń kúni belgilengen baǵamy boıynsha eseptelgen somada áketýge tyıym salynady. Muny ásirese shetelge shyǵatyn el azamattary men sheteldikter bilýi kerek.
Biraq bul talapqa kóz juma qaraıtyn ózge eldiń azamattary zańsyz tabysty qaltaǵa basýdy kózdeıtini baıqalady. Buǵan Grýzııanyń azamatynyń H.Dospanova atyndaǵy Atyraý halyqaralyq áýejaıynda 90 myń dollarmen ustalǵany dálel. Oblystyq memlekettik kirister departamenti baspasóz qyzmetiniń málimetinshe, bul derek 11 aqpanda tirkelgen.
«Eýrazııalyq ekonomıkalyq odaqtyń kedendik shekarasy arqyly «Atyraý-Kýtaısı» baǵytyndaǵy №KS-7993 halyqaralyq áýe reısine tirkeý kezinde Grýzııa Respýblıkasy azamatynyń qol júginde 10 myń dollar bolǵan.
«Alaıda shekaralyq baqylaý bólimshesi men Atyraý oblysy boıynsha Ekonomıkalyq tergep-tekserý departamentiniń qyzmetkerlerimen birge kedendik baqylaý júrgizilip, sheteldiktiń júgi tekserildi. Sol kezde Grýzııa Respýblıkasy azamatynyń chemodanynan 90 myń dollar tabyldy. Qomaqty mólsherdegi valıýta kedendik baqylaýdan jasyrylǵan. Sheteldikten alynǵan 100 myń dollar «DHL Interneıshnl Qazaqstan» JShS ýaqytsha saqtaý qoımasyna qabyldaý-tapsyrý aktisimen ornalastyryldy», dep habarlady departamenttiń baspasóz qyzmeti.
Atyraý oblysy