Konstıtýsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda depýtattar Qazaqstan men О́zbekstan úkimetteri arasyndaǵy azamattardyń ózara saparlarynyń sharttary týraly kelisimge engizilgen ózgerister týraly zańdy talqylady.
Zańnyń maqsaty – eki el arasyndaǵy dostyq qatynastardy odan ári damytý, azamattardyń saparlaryn retteý, sondaı-aq bir memleket adamdarynyń ekinshi memlekettiń aýmaǵynda bolýyna qolaıly jaǵdaı jasaýǵa quqyqtyq negiz qalyptastyrý. Qujatta taraptar azamattarynyń ózge elde bolý kezeńi shekaradan ótken sátten bastap 30 kúnnen aspasa, onda sol eldiń aýmaǵynda quzyretti organdarda tirkelmeı bolýdyń ońaılatylǵan tártibi kózdelip otyr. Osylaısha, eki memleket azamattardyń óz aýmaqtarynda ýaqytsha tirkeýsiz júrýdiń merzimin 5 kúnnen 30 kúnge deıin ulǵaıtty.
Senatorlardyń aıtýynsha, hattamany ratıfıkasııalaý jáne ony iske asyrý barysynda teris áleýmettik-ekonomıkalyq jáne quqyqtyq saldary bolmaıdy, sondaı-aq memleket bıýdjetinen qosymsha qarjy shyǵyndary talap etilmeıdi.
Keńeıtilgen otyrystyń qorytyndysynda depýtattar «2000 jylǵy 7 shildedegi Qazaqstan Respýblıkasynyń Úkimeti men О́zbekstan Respýblıkasynyń Úkimeti arasyndaǵy Azamattardyń ózara saparlarynyń sharttary týraly kelisimge ózgerister engizý týraly hattamany ratıfıkasııalaý týraly» zańdy Palatanyń qaraýyna jiberý týraly sheshim qabyldady.