Bıyl 6000-nan astam azamat belgilenbegen jerden temir jol tósemin kesip ótkeni úshin jaýapkershilikke tartylǵan. О́tken aptada poıyzdardyń adamdardy qaǵyp ketýdiń 5 faktisi tirkelgen. Jazataıym oqıǵalar Soltústik Qazaqstan, Jambyl, Túrkistan, Qyzylorda, Aqtóbe oblystarynyń aýmaǵynda bolyp, onyń úsheýinde adamdar jaraqat alsa, ekeýi ólimmen aıaqtalǵan. Bul týraly departament bastyǵynyń birinshi orynbasary Madııar Aıtýǵanov málimdedi, dep habarlaıdy Egemen.kz Polisia.kz-tiń baspasóz qyzmetine silteme jasap.
Onyń aıtýynsha, kóliktegi PD qyzmetkerleri temirjol tóseminde jaraqat alý men jazataıym oqıǵalardyń aldyn alý maqsatynda turǵyndarmen jáne oqý oryndarynyń oqýshylarymen turaqty negizde kezdesýler ótkizip turady. Qabyldanyp jatqan sharalardyń nátıjesinde osy kezeńde departamentte jyljymaly quramnyń balalardy qaǵyp ketýdiń birde-bir faktisi tirkelmegen. Áıtse de, keıbir azamattar temirjol kóligi obektilerindegi qaýipsizdik erejelerin buzýdy jalǵastyryp júr, al onyń sońy aýyr zardaptarǵa ákep soǵady.
«Bıyl jyl basynan beri temirjol kóligindegi qaýipsizdik erejelerin buzýdyń, ıaǵnı azamattardyń belgilenbegen jerlerden temirjoldy kesip ótýdiń 6179 faktisi anyqtaldy. Sondaı-aq temirjolda adamdardyń, úı janýarlarynyń bolýyna jáne bógde zattardy qoıýǵa baılanysty poezdarda shuǵyl tejeýdi qoldanýdyń 280-nen astam faktisi tirkeldi. Temirjoldaǵy qaýipsizdik taqyryby óte ózekti másele. Azamattar kóbinese, aspaly kópirlerden ótpeı, joldy qysqaryp, ýaqytty únemdegisi keledi. Munyń sońy temirjol jaraqatyn alýǵa nemese adam ólimi jaǵdaılaryna ákep soǵady. Sondyqtan bir mınýtty únemdeımin dep ómirińizdi qysqartyp almańyz. Eń bastysy, qarapaıym erejelerdi este saqtaǵan jón: «Temirjol jaıaý júrginshilerge arnalǵan jol emes!», «Temirjol – asa qaýipti aımaq!», dedi M. Aıtýǵanov.