Keshe fýtboldan ÝEFA Chempıondar lıgasynyń 1/8 fınalyna shyqqan komandalardyń sońǵy juptary kúsh synasty. Bul básekeler Italııanyń Neapol jáne Portýgalııanyń Portý qalalarynda ótti.
Neapoldaǵy matchta gol týra bir saǵattan soń soǵyldy. Birinshi taımda «Barselona» qarsy jaqqa jeti soqqy jasasa, sonyń úsheýi qaqpaǵa dál baǵyttaldy. Tek qaqpashy Aleks Merettiń alǵyrlyǵynyń arqasynda esep ashylǵan joq. Alań ıeleri birde-bir qaýipti jaǵdaı jasaı almady. Desek te 60-mınýtta dop torda týlady. Pedrıden jaqsy pas alǵan Robert Levandovskı nysanany dál kózdedi – 0:1. Biraq katalonııalyq klýb bul esepti uzaq saqtap tura almady. Arada 15 mınýt ótkennen soń Vıktor Osımhen tarazy basyn teńestirdi.
Pıreneı túbeginde «Portý» men «Arsenal» arasynda ótken matchta da qos komandanyń oıynshylary qansha jantalassa da, dopty dál tebe almady. Negizi ýaqyt aıaqtalyp, tóreshi belgilegen 4 mınýtynyń sońǵy sekýndynda Serjıý Konseısaýdyń shákirtterin qarymta shabýyl uıymdastyryp, Vanderson Galenonyń alystan tepken dobyna qaqpashy tosqaýyl bola almady – 1:0.