Pyqyp zeınetker, menen bir múshel jas kishi bolsa da ekeýimiz únemi kezdesip, syrlasyp otyryp áńgimeniń árin kirgizetin ádetimiz bar.
Bul kelgeninde áńgime ózegi «kaspi» banki tóńireginde bolyp, onyń myna zamanǵa oraı táýir dúnıe bolyp, jaqsylyǵyn shıyrlaýmen boldyq. Ásirese, qolma-qol aqshadan qutqarǵanyna quldyq urdyq.
Pyqekeń bul kelgeninde – qudaı bere salǵan úbirli-shúbirli nemereleriniń aldy er jetip, eki uldyń eń úlkenderi toǵyz jastan asyp, olarǵa ákeleri «kaspi gold»-tan shot ashyp bergenin tilge tıek etti.
– Eki uldyń úlkenderi, aınalaıyn eki nemerem habarlasyp, «kaspi gold»-tan kártishke alǵandaryn aıtyp súıinshi suraǵanda qýanǵanymdy aıtsańshy! «Mine, er jettińder, kártishkeleriń qutty bolsyn!» dep, súıinshisine on myń teńgeden, alǵashqy saýdasyna dep bes myńnan aýdaryp marqaıyp qaldym, – dedi.
Kezikpegenimizge kóp bolǵan, bir bas qosyp baquldasyp otyrǵanymyzda Pyqyp:
– E, ana nemerelerdiń baqandaı jeteýi qosý-alý amaldaryn meńgergen mezetinde álgi bankiden shot ashylǵan eken... nemerelerimnen nemdi aıaıyn, bárin rıza ettim, – dep kúmiljigeni bar.
Sodan, kelesi kezikkenimizde:
– O bastaǵy qýanǵanym bar bolsyn, nemerelerdiń aqsha suraýy kóbeıdi... – dep kúmiljıdi. – Bir pensııany qaısysyna jetkizeıin, qýlyqqa baryp: «Ákeleriń ruqsat etse...» dep edim, ákeleri: «Balasyna ákesiniń pármeni júrmeıdi» depti. E, ótkende, qurdastarmen kóńildi otyrǵan sátimde habarlasyp... túbim túsipti...
Taǵy bir basymyz qosylǵanda Pyqypqa sóz reti kelgende:
– Nemereleriń... – dep qalyp edim:
– Páleketter, qazirginiń balalary pále, alǵashynda amandasyp qana aqsha suraýǵa kóship, men de syltaý aıtyp sytylyp ketýshi edim, qazir «hal suraýdy» quıqyljytyp, atasynan ótken ardaqty da asyl adam joq ekenin aıtyp, maqtaý sózderdi toǵytqanda... et-júrek eljirep... qalaı ǵana suraǵanyn jiberip sympııa qalatyn boldym, – dep kúmiljigen boldy.
Sodan, Pyqekeńmen kezikken saıyn áńgimemizde nemereleriniń «kaspi gold»-yn qalys qaldyrmaımyz. Ol nemereleriniń shotyna aqsha aýdaramyn dep aryp-arshyǵanyn moıyndady... Qaıtsin, ishten shyqqan shubar jylan, o basta aqshaǵa úıretken ózi, óz qolyn ózi kessin be, ár nemeresiniń aqsha surardaǵy «erekshe qylyqtaryn, dámdi de árli sózderin» aıta otyryp, aqsha salmasqa amal qaldyrmaıtyn ádis-tásilderin keltirip, keıingi kezde olarǵa jiberetin pensııasy jetpeı jelke qıylyp, amalsyz kempirinikine aýyz salyp júrgenin aıtty.
Sodan, Pyqyppen kezikpegeli alty aıdan asqan, telefonyna habarlassam «ýaqytsha sóndirýli» deı bergen soń: «Pyqeke, kezikpeımiz be?» dep habarlama jibersem, eki kúnnen soń odan: «Aıyp etpe, ózińnen esh nárse jasyrmaýshy edim ǵoı, men qazir qaladan birjola kóship ketkenmin. Sebep, ana «kaspi» túbime jetti... Týrasyn aıtsam, qudaıǵa shúkir bere salǵan onnan asa nemeremniń bári eseıip, bári shot ashqan soń nemerelerge jiberetin qaýqar bolmaı... qysqasy, «kaspi gold» turmaq, telefon ataýlyny qabyldamaıtyn sonaý túkpirdegi elsiz mekenge kóship ketkenmin...» degen habarlama aldym...
Sodan, biraz jyldan soń mende pensııaǵa shyǵyp, bárekeldi dep otyrǵanymda nemerelerimniń úlken ekeýi habarlasyp: «Ata, biz «kaspi gold»-tan shot ashtyq» dep súıinshi surap, olardyń eseıgenine qýanyp, birden súıinshisine dep, alǵashqy saýdasyna dep aqsha jiberip marqaıyp... sálden soń baıaǵy Pyqekeńniń keıpi esime túsip eseńgirep otyrmyn...
Berik SADYR