Oblystyq jastar resýrstyq ortalyǵy jyl saıyn dástúrli túrde uıymdastyryp otyratyn «Qar desanty» aksııasynyń jalǵyzilikti qarttar men múmkindigi shekteýli jandarǵa kómegi mol. Qaıyrymdylyq aksııasy aıasynda erikti jastar keıingi bir jarym aıdyń ishinde 500-ge tarta aýlanyń qaryn tazartyp shyqqan.
Bul joly qala turǵyny Aıjan Qaskenovanyń úıine barǵan erikti jastar jalǵyzbasty jannyń aýlasyn basyp qalǵan kúrtik qardy bir demde-aq kúrep, esiginiń aldyn aınadaı ǵyp jaltyratyp berdi. Aıjan Qaskenova jer úıde turady. Osydan on jyl buryn ınsýlt alyp, arbaǵa tańylyp otyr. «Buryn týǵan baýyrym kómektesetin. Qazir ol da naýqastanyp qaldy. О́zimniń qar arshymaq túgili, esik aldyna shyǵýym muń. Volonterler úıge birinshi ret kelip otyr. Telefon soǵyp, ózderi habarlasqan soń, qarsylyq tanytpadym. Kileń janyp turǵan jas balalar. Bári ǵumyrly, baqytty bolsyn. Alǵystan basqa aıtarym joq», deıdi múmkindigi shekteýli jan.
Jastar resýrstyq ortalyǵynyń jetekshisi Abaı Dúısekovtiń aıtýynsha, volonterler bir kúnniń ishinde on shaqty úıdiń aýlasyn tazartyp shyqqan.
«Bul ıgi isti jyl saıyn ótkizip turamyz. Aksııa qańtar aıynda bastalyp, keı jyldary naýryzdyń aıaǵyna deıin sozylyp ketedi. Qalada turatyn zeınetkerler men múmkindigi shekteýli jandardyń mekenjaıyna habarlasyp, hal-jaǵdaılaryn surap, qandaı qol kómek kerek ekenin surap otyramyz. Ol kisiler de bizdi bilip alǵan. Keıde ózderi habarlasyp jatady. О́ıtkeni óz kúshterimen qar arshı almaıdy. Al jap-jas jigitterge ol qıyn jumys emes, jabylyp júrip áp-sátte-aq kúrep tastaımyz. О́zimizdiń kúrek-súımen, sypyrǵy, shanalarymyz bar», deıdi ortalyq jetekshisi.
Qostanaıdyń saqyldaǵan sary aıazyna qaramastan kúrek ustap, qar kúrep, qarttarǵa kómek kórsetip júrgen jigitterdiń ishinde qarakóz qyzdarymyz da bar. Solardyń biri – joǵary oqý ornynyń stýdenti Gúlaıym Nábı. Keshe ǵana aýyldan kelgen boıjetken qasyndaǵy bozbalalardan qalyspaıdy. О́zinen úlken kúrekke jarmasyp alyp jaǵalasyp qar kúrep júr. Aıtýynsha, volonter jastardyń qataryna qosylǵanyna bir jyldaı bolǵan.
«О́zim aýylda qar arshyp júrip óstim. Bir jyldan beri ortalyq uıymdastyrǵan is-sharalarǵa qalmaı qatysyp júrmin. Osy joly qart kisilerge járdemdesýge keldik. Erikti bolǵan ózime unaıdy. Eldiń batasyn alyp, yqylasyna bólengen adam jaman bolmaıdy. Ata-anam qolyńnan kelip jatsa, adamǵa járdemdes, qaıyrymdy, saýapty isten qashpa degendi jadymyzǵa quıyp otyratyn», deıdi Gúlaıym.
Qostanaı oblysy