Tanymal aktrısa, prodıýser Baıan Alagózova “Sakýra. Is maı laıf” fılminiń óz ómirimen qanshalyqty baılanysy bar eken aıtty, dep habarlaıdy Egemen.kz.
“Zamandas” arnasyna suhbat bergen óner ıesi qylmys áleminiń serkesi, dostarynyń arasynda úlken bedelge ıe jigitke turmysqa shyqqanyn esine aldy.
- Otbasylyq ómirimizdiń nemen aıaqtalǵanyn búkil el jaqsy biledi. Tipti, ol oqıǵa umytylǵan joq. Fılmge keıbir basymnan ótken oqıǵalardy qosqanym ras. Biraq ol meniń tutas avtobıografııalyq ómirimnen alyndy degen sóz emes. Fılm - fantastıka emes. Ondaǵy barlyq dıalog, stıl sol zamanda bolǵan. Tipti, teatr ınstıtýtynda oqyp júrgende reket jigitterdi kóretinbiz. Jataqhanaǵa da keletin. Qoldarynda sol kezde-aq sýyq qarý bolatyn. Kózimizben kórdik, – dedi aktrısa.
Sonymen qatar ol qylmys áleminiń serkeleri qandaı bolatynyn da sıpattap berdi.
- Olar óte myqty, bilegine senetin jigitter. Bizdiń zamanymyzda sondaı jigitter úlken bedelge ıe edi. Olardy basqa stýdent jigittermen salystyra almaısyń. Olarda aqsha da, sońǵy úlgidegi kıim de bar. Eń qymbat kólikpen júrdi. Al onyń bári biz sekildi stýdent qyzdarǵa tańsyq edi. Olardyń qolyndaǵy zattar dúkende satylmaıtyn. Bir kúni sondaı “bandıt” jigittiń biri maǵan bir qorap shokolad ákelip bergen. Qatty tańǵaldym. Ol kezde bir túıir shokolad jeseń, máz bolasyń. Sol momentti fılmge kirgizdim. Tipti, jarnamadaǵy temekini shegetin jigitti “eń myqty erkek” dep oıladyq, – dep aǵynan jaryldy prodıýser.