«Azýrıt» 2018 jyly on shaqty adam jumys isteıtin shaǵyn ǵana tigin sehy edi. Ádette jeńil ónerkásiptiń naryqtaǵy joly aýyrlaý bolyp keledi.
Soǵan qaramastan memleket qoldaýyna arqa súıegen shaǵyn seh tabandy izdeniske toly alty jyldyń ishinde san salanyń jumysshy, mamandaryna arnap arnaıy kıim tigip shyǵaratyn tabysty kásiporynǵa aınaldy. Endi, mine, 100 tiginshi eńbek etetin irgeli fabrıka mártebesine ıe bolyp, qaıta ashylyp otyr.
Tigin fabrıkasy búginde óńirdegi otyzdan astam kásiporynnyń tapsyrysyn túgendep, jumysshylaryn kıindirip otyr. Olardyń ishinde «SaryarqaAvtoProm», «AgromashHoldıng KZ» tárizdi mashına jasaý zaýyttary, «Varvarınskoe», «Komarov» sekildi iri ken kásiporyndary, Ahmet Baıtursynuly atyndaǵy Qostanaı halyqaralyq áýejaıy, myń jarym adam jumys isteıtin «Baıan sulý» kondıterlik fabrıkasy, «Qazaqtelekom» AQ-nyń fılıaly bar. Kásiporyn, munyń syrtynda, oblystyń densaýlyq saqtaý mekemeleri men mektepterine, sondaı-aq san alýan qyzmet kórsetý salasynyń mamandaryna arnaıy kıim tigedi.
Jańa bir belesin baǵyndyrǵan kásiporynnyń ashylý rásimine Qostanaı qalasynyń ákimi Marat Júndibaev qatysty. Tigin fabrıkasy bıyldan bastap ortopedııalyq jastyq shyǵaratyn óndiristik sehyn iske qosqan. Aldaǵy ýaqytta mundaǵy óndiris aýqymyn álde de keńeıte túsýdi josparlap otyr.
«Qazir fabrıkada 100 adam eńbek etip jatyr. Alaıda tigin fabrıkasy aldaǵy ýaqytta taǵy 100 adamdy jumysqa alýdy kózdep otyr. Onyń ústine biz tigin fabrıkasynyń tek áıel adamdarǵa jumys berip otyrǵanyn eskerýimiz kerek. Sondyqtan bul Qostanaı qalasy úshin óte mańyzdy», deıdi ákim.
Kileń áıelder jumys isteıtin úlken ujymnyń «arpa ishindegi bir bıdaıy» – Aleksandr Shtıben. «20 jyl boıy áıelderden qalyspaı jumys istep kelemin. Kásibim ózime unaıdy», deıdi tiginshi.
Kásiporynnyń ortopedııalyq jastyq jasap shyǵaratyn sehynda jergilikti kolledjdiń túlekteri jumys istep jatyr. Seh qazirshe táýligine 150 jastyq shyǵarady. Baǵasy kólemine qaraı ártúrli: 9 myń teńgeden 13 myń teńgege deıin barady. Taıaýda arnaıy sertıfıkatqa ıe bolǵan fabrıka basshylyǵy endi oblystyq aýrýhanany naryqtaǵy baǵadan arzanyraq jastyqtarmen qamtamasyz etý jaǵyn qarastyryp jatyr.
Ortopedııalyq jastyq shyǵaryp jatqan qurylǵylarmen jeńil kólikke arnalǵan oryndyqtardy da shyǵarýǵa bolady eken. Sondyqtan kásiporyn Qostanaıda qurastyrylyp jatqan jeńil avtokólik óndirisiniń jergilikti úlesin arttyrý maqsatynda «JAC S3», «Chevrolet Onix» avtomobılderine arnalǵan oryndyqtardy shyǵarýdy da josparlap qoıǵan. Bul joba sátimen júzege assa, tigin fabrıkasynyń janynan jeńil avtomobılderge arnalǵan oryndyqtar shyǵaratyn taǵy bir kásiporyn iske qosylýy múmkin. Buǵan qala ákimdigi men «Damý» qory eki jaqtap qoldaý kórsetýge daıyn otyr. Jalpy, tigin fabrıkasynyń ǵımaraty da memleket qoldaýymen salynǵanyn aıta ketken jón. Kásiporyn ǵımaratty salyp shyǵý úshin «Damý» kásipkerlikti damytý qory arqyly 350 mln teńge jeńildetilgen nesıe alǵan.
«Áý basta bizde 12 ǵana adam jumys istedi. Qaı jerde kórme uıymdastyrylyp jatsa, sol jerge baryp, ónimderimizdi kórsetip, kóp izdenýge týra keldi. Bizdiń elimizde jeńil ónerkásiptiń damýyna qolaıly jaǵdaı bar. Tek istiń kózi taba bilý kerek», deıdi «Azýrıt» tigin fabrıkasynyń basshysy Svetlana Shıpılkına.
QOSTANAI