Keıde oryndy-orynsyz jerde kólik toqtatyp, qujat kórsetýdi suraǵan polısııa qyzmetkerlerine renish bildirip jatamyz. Biraq mundaı tosyn toqtatýlardyń kóbine-kóp qoǵam qaýipsizdigi úshin jasalatynyn da bilip júrý kerek. О́tken senbide dál osyndaı jaǵdaı boldy, dep habarlaıdy Egemen.kz.
Qostanaı men Tobyl qalasyn jalǵap jatqan kópir jol kútpegen jerden jabylyp, tártip saqshylary qalaǵa kirip-shyǵyp jatqan avtokólikterdi toqtatyp tastap, jappaı teksere bastaǵan.
Kóp keshikpeı Tobyl qalasynda qylmys jasaǵan kúdiktiniń izdestirilip jatqanynyn habarlaǵan PD baspasóz ortalyǵy turǵyndardan jol ústindegi jedel-izdestirý sharalaryna sabyr tanytyp, túsinistikpen qaraýdy jáne tek resmı aqparatqa ǵana senýdi suraǵan.
Kóp uzamaı qarýly qaraqshylyq jasaǵan er adam ustaldy. Kúdikti qazir qamaýda otyr degen habar aldyq. Oblystyq polısııa departamenti baspasóz qyzmetiniń málimetinshe, kúdikti 24 aqpanda tapa-tal túste Tobyl qalasyndaǵy metall qabyldaý pýnktteriniń birin tonap ketken. Jumys basynda otyrǵan adamdardy qarýmen qorqytyp, kassada jatqan 792 myń teńgeni alyp iz sýytqan.
Jurttyń az ýaqyt ábigerge túsýiniń sebebi – osy: polısııa arnaıy uıymdastyrylǵan jedel izdestirý sharalary aıasynda avtokólikterdi de jappaı teksergen. Bulaı etpese, taǵy bolmaıdy, kúdikti ary-beri aǵylyp jatqan kóliktiń kez kelgen bireýine minip ketýi múmkin.
«Biz kúdiktini Rýdnyı qalasynda ustadyq. Tapansha, aqsha, balaklavaǵa, ıaǵnı betbúrkemesi bar baskıimge uqsas zatty tárkiledik. Qazir qajetti tergeý amaldary júrgizilip jatyr. Tárkilenip alynǵan qarýǵa arnaıy saraptama taǵaıyndaldy», dedi PD Krımınaldyq polısııa basqarmasynyń bastyǵy Iýrıı Polıýhov.
Kúdiktiniń múlki tárkilenip, 5 jyldan 10 jylǵa deıin bas bostandyǵynan aıyrylýy múmkin. Polısııa departamenti senbi kúni týyndaǵan jol qolaısyzdyǵyna túsinistikpen qaraǵan turǵyndarǵa alǵys bildiredi.