Astana Memlekettik qyzmet haby Basqarýshy komıteti tóraǵasy Álıhan Báımenov pen Qytaı ulttyq memlekettik basqarý akademııasy atqarýshy Vıse-prezıdenti Sı Chýntao ekijaqty yntymaqtastyq máselelerin talqylady, dep jazady Egemen.kz.
Kezdesýge QHR-nyń Qazaqstandaǵy Tótenshe jáne О́kiletti Elshisi Chjan Sıao, QKP Ortalyq komıteti men Qytaı ulttyq memlekettik basqarý akademııasy ókilderi qatysty.
Kezdesýde Álıhan Báımenov: «qaı zamanda da sanalýandyq adamzat órkenıeti damýynyń sheshýshi faktory bolǵan. Sonymen qatar dıalog pen yntymaqtastyq damýǵa árdaıym jańa serpin, qýat beredi», dedi.
Onyń aıtýynsha, Qytaı Hab bastamalaryna teń quryltaıshylarynyń biri retinde belsendi aralasyp, qoldaý kórsetip keledi.
Sı Chýntao byltyr Beıjińde ótken «О́rkenıet dástúrleri jáne modernızasııa joly» Forýmy men sol forým aıasynda qurylǵan Qytaı-Ortalyq Azııa memlekettik basqarý akademııalary Jelisi - Qytaı jáne Ortalyq Azııa elderiniń Sıandaǵy kóshbasshylar sammıtinde qabyldaǵan sheshimderdi iske asyrýynyń alǵashqy tetikteriniń biri bolǵanyn aıtty.
Ol Qytaı ulttyq akademııasy Astana memlekettik qyzmet habymen jáne basqa da ınstıtýttarmen yntymaqtastyqty nyǵaıtýǵa daıyn ekenin jetkizdi. Yntymaqtastyq aıasynda bıyl birqatar is-sharalar ótkizý josparlanyp otyrǵanyn ekenin, osy rette Qytaıda ótetin Memlekettik basqarý forýmyna shaqyrdy.
Álıhan Báımenov te memlekettik basqarý akademııalary Jelisiniń áleýetin tolyqqandy iske asyrý úshin birqatar ortaq jobalar usyndy. Sondaı-aq Habtyń praktıkter alıansyn qurý salasyndaǵy tabysty tájirıbesin eskere otyryp, «teń teńimen» qaǵıdaty negizinde turaqty tájirıbe men bilim almasý úshin oqý baǵdarlamalaryn ázirleýge jaýaptylar arasynda praktıkter Alıansyn qurý boıynsha bastama kóterildi.
Sonymen qatar birge arnaıy zertteýler jasap, onyń ishinde Qytaı tájirıbesi negizinde keıs-stadı ázirleý ári Jelige qatysýshy elder ǵalymdarynyń maqalalaryn Hab jýrnalynda arnaıy bólimde toptastyrý sóz boldy.
Qytaı tarapy aımaqta jáne odan tys jerlerde memlekettik basqarý akademııalarynyń Qytaı-Ortalyq Azııa jelisiniń qyzmetin keńeıtýdegi yntymaqtastyq serpini men Hab platformasy áleýetin joǵary baǵalady. Kezdesýge qatysýshylar birlesken bastamalardy iske asyrý jóninde yntymaqtastyqty jalǵastyrýǵa daıyn ekenderin jetkizdi.
2023 jyly Memlekettik basqarý akademııalarynyń Qytaı-Ortalyq Azııa jelisin qurý týraly kelisimge qol qoıyldy. Onyń quramyna Habty qosa alǵanda alty eldiń (Qytaı, Qazaqstan, Qyrǵyzstan, О́zbekstan, Tájikstan jáne Túrikmenstan) memlekettik mekemeleri kirdi. Jeliniń maqsaty – kadrlardy daıarlaý jáne qaıta daıarlaý máselesimen qatar memlekettik basqarýdy transformasııalaý salasynda tájirıbe men bilim almasý.