О́tken jyly Memleket basshysy Qasym-Jomart Toqaevtyń elimizde sheteldik jetekshi joǵary oqý oryndarynyń fılıaldaryn ashý jáne ónerkásip ınjenerleriniń jańa býynyn qalyptastyrý jónindegi tapsyrmasyn oryndaý maqsatynda Qazaq-nemis ınjınırıng ınstıtýty ashylǵan edi. Atalǵan oqý orny jasyl sýtegin óndiretin zaýytqa ınjenerler daıarlamaq.
Qazaq-nemis ınjınırıng ınstıtýtyn ashýdaǵy maqsat – úzdik nemis tájirıbesin engizý, ekonomıka qajettiligin eskere otyryp, sapaly ınjenerııa mamandaryn daıarlaý, Germanııa joǵary oqy oryndary men Yessenov University kásibı jáne mádenı yntymaqtastyǵyn nyǵaıtý.
Qazirgi tańda Mańǵystaý oblysynda energetıka salasynda birqatar iri jobalar iske asyrylyp keledi, sonyń biri – jasyl sýtegin óndiretin zaýyt. Osyǵan oraı, jańa Qazaq-nemis ınstıtýty 2030 jylǵa deıin ınjenerııa salasyndaǵy ozyq tájirıbe negizinde myń stýdentti oqytyp, jergilikti jastar men elimizdiń ózge óńirleriniń turǵyndary arasynda suranysqa ıe tehnıkalyq mamandardy daıarlaý josparlanǵan.
Bakalavrıattyń alǵashqy stýdentterin oqytý osy jyldyń qyrkúıek aıynda bastaldy. Bıylǵy oqý jylynda daıyndyq eki bakalavrıat baǵdarlamasy: Gambýrg tehnıkalyq ýnıversıtetiniń «Energetıka jáne ekologııa ınjenerııasy» jáne Vıldaý tehnıkalyq ýnıversıtetiniń «Logıstıkasy» boıynsha júzege asyrylyp jatyr. Qazirgi kezde onda 44 stýdent oqıdy.
Keshendi oqý baǵdarlamasy Sh.Esenov atyndaǵy ýnıversıtette úsh jyl jáne Germanııadaǵy seriktes ýnıversıtette bir jarym jyl oqý merzimin qamtıdy. Osyǵan baılanysty jańa JOO-da nemis tilin úırenýge kóp kóńil bólinedi.
Bilim berý baǵdarlamasy aldaǵy ýaqytta segiz bakalavrıat jáne alty magıstratýra baǵdarlamalaryna deıin kóbeıedi.