Ýaqytynda aýdan ortalyǵy retinde aty dúrkiregen Aqkól aýyly táýelsizdiktiń eleń-alańynda talaı qıyndyqty bastan ótkerdi. Jyldar jylystaǵan saıyn jergilikti atqarýshy bılik eldi meken turǵyndarynyń talap-tilegin eskerip, áleýmettik máseleler ońynan sheshile bastady. Endi, mine, aýyl turǵyndary talaı jyl «jyrlaǵan» kógildir otyn máselesi de sheshimin tapty.
Talaı myqty tulǵa dúnıege kelgen Aqkól aýylynda jalpy sany 411 aýlada 2 242 adam qonystanǵan. Birligi jarasqan aýyl turǵyndary dál osy qýanyshty sátti jyldar boıy kútti. Sol úmitti aqtap, jergilikti bılik ýádesin oryndap, aýyl turǵyndaryn qýantyp otyr.
О́ńir basshysy Erbol Qarashókeev aqkóldik aǵaıynnyń qýanyshyna ortaqtasty. Kógildir otyndy kópten kútken turǵyndarmen júzdesken oblys basshysy Talas aýdanynyń ózge de aýyldaryndaǵy áleýmettik máselelerdi retimen sheshý jumystary aldaǵy ýaqytta da tolassyz jalǵasa beretinin, halyqtyń muń-muqtajyn tyńdaýǵa qashan da ázir ekenin aıtyp, jergilikti jurtshylyqty tabıǵı gazdyń aýylǵa jetýimen quttyqtady.
«Memleket basshysy Qasym-Jomart Toqaev jergilikti atqarýshy bılik ókilderine halyqtyń turmys-tirshiligin barynsha jaqsartý qajettigin tapsyrǵany málim. Osy turǵydan alǵanda elimizdiń ár qıyrynda aýqymdy jumystar qolǵa alynyp, oń nátıje berip jatqanyn kúnbe-kún kórip júrmiz desek, qatelespeımiz. Bizdiń basty maqsatymyz – óńir jurtynyń únine qulaq asý, máselelerdi der kezinde sheshý. Talaı tarlan tulǵa dúnıege kelgen Talas aýdanyndaǵy túıtkildi máselelerdi der kezinde sheshýge biz qaı kezde de kúsh salýǵa daıynbyz. Búgin aýdandaǵy iri eldi mekenderdiń biri sanalatyn Aqkól aýylynda tabıǵı gaz paıdalanýǵa berilip otyr. Bul – aýyl turǵyndary uzaq jyldar boıy saryla kútken qýanysh. Eldi meken halqyn osy bir qýanyshty sátpen quttyqtaımyn. Jaqsy kúnderimiz kóp bolsyn», dedi E.Qarashókeev.
Is-shara barysynda sóz alǵan Aqkól aýyldyq okrýgi ardagerler keńesiniń tóraǵasy Dosbolat Týǵanbaev sóz alyp, jergilikti halyqtyń qýanyshyna ortaqtasqan óńir basshysyna rızashylyǵyn jetkizdi.
Talas aýdany ákimdigi baspasóz qyzmeti keltirgen derekke júginsek, aımaqtaǵy ózge de eldi mekenderdi kógildir otynmen qamtý boıynsha aýqymdy jumystar atqarylǵan. Osy jyldyń basynda Qyzyláýit jáne Aqtóbe aýyldary turǵyndarynyń talap-tilegi eskerilip, eldi mekender kógildir otyn júıesine qosylypty.
Keıingi jyldary kezinde aty dúrkiregen Aqkól aýylyna jergilikti bılik tarapynan aıtarlyqtaı kómek kórsetilip jatyr. Aýyl ishindegi joldardy jóndeý jumystary júıeli túrde júrgizildi.
«Aýdanymyzdaǵy irgeli aýyldardyń biri sanalatyn Aqkól aýyly halqynyń kókeıkesti máselelerin sheshý boıynsha naqty jumystar qolǵa alynǵanyn aıta ketken jón. Máselen, 2021-2023 jyldar aralyǵynda eldi mekendegi 20 kósheniń joly jóndeýden ótkizildi. Jaıaý júrginshilerge arnalǵan jol jolaqtary qalypqa keltirildi. Qazirgi kezde kóshelerdi tolyqqandy jaryqtandyrý jumystary júrgizilip jatyr», deıdi Talas aýdanynyń ákimi Nurbol Júnisbekov.
Resmı derekke júginsek, oblys aýmaǵyndaǵy eldi mekenderdi tabıǵı gazben qamtý maqsatynda ótken jyly 11,8 mlrd teńge qarjyǵa 11 joba iske asyrylǵan. Onyń altaýynyń jumysy 2024 jylǵa ótpeli. Qazirgi tańda óńir halqyn tabıǵı gazben qamtý úlesi 91,1 paıyzǵa jetken.
Aýyldardy kógildir otynmen qamtý jumystary bıyl da sátimen jalǵaspaq. Osy jyly 11 aýylda turatyn 17 myń halyqty tabıǵı gazben qamtý kózdelip otyr. Nátıjesinde, kógildir otynmen qamtamasyz etilgen óńir halqynyń qarasy 92 paıyzǵa jetedi eken.
Aýdandyq ákimdik ókilderi keltirgen derekke júginsek, Talas aýdanynda Qarataý qalasyn qosa eseptegende 23 eldi meken bar bolsa, sonyń 18-i gazdandyrylǵan, ıaǵnı kórsetkish 75 paıyzdy qurap otyr. 2027 jyldyń sońyna deıin bul kórsetkishti 100 paıyzǵa jetkizý josparlanǵan.
Jambyl oblysy,
Talas aýdany