Almatylyqtar jaqsy biledi, ótken jyly araǵa alpys jyl salyp alǵash ret Áýejaı kóliniń túbi tazalanǵan bolatyn. О́ıtkeni sý qoımasy 1963 jyldan beri tazartylmaǵan edi. Sol sııaqty qalanyń qaq ortasyndaǵy Saıran kóliniń de kórki kirip, jergilikti faýna qalpyna kele bastady.
Saıran kóli de byltyr ǵana qala bıliginiń tikeleı aralasýymen tazartylǵan edi. Sebebi turǵyndar tarapynan shirigen tunba men qamystyń múńkigen ıisine shaǵym kóbeıip ketken-di. Sonymen kóldiń túbi men jaǵasynan 140 myń tekshe metrden asa qoqys pen laı shyǵaryldy.
Saıran kóli qala turǵyndary serýendeıtin súıikti oryn bolsa, almatylyqtar keıingi ýaqytta kólde balyqtar paıda bola bastaǵanyn, jaǵalaýda balyq aýlap júrgen qustardy baıqaǵanyn aıtyp júrgen-di.
Al taıaýda fotograf Dmıtrıı Dosenkoǵa aqqutannyń kókbas balyqty aýlap turǵanyn sýretke túsirip alýdyń sáti túsipti. «Bul bizdiń Alataýdyń endemık-balyǵy bolǵandyqtan, men óte qundy sýret túsirdim dep oılaımyn. Oılap qarańyzshy, 2024 jyly – osy zamanda eki mıllıon turǵyny bar megapolıstiń qaq ortasynda endemık naǵyz jabaıy tabıǵatty kóre alasyz. Bul ǵajap qoı, ony qorǵaý kerek», – deıdi almatylyq fotograf Instagram paraqshasynda.
Áýejaı kóli qalanyń tómengi Túrksib aýdanynda ornalasqan. Sý qoımasynyń tolymdylyǵy –1 250 000 tekshe metr, ortasha tereńdigi shamamen – 8 metr. Onyń da jaǵasyna kúnine myńnan asa adam keledi.
Qazirgi tańda kólge zertteý júrgizilip, jobasy túzetilip jatyr. Sý aıdyny tolyq qurǵatylǵannan keıin, osy jyldyń ekinshi toqsanynda oǵan 3 shynjyr tabandy ekskavator, 1 tıegish, 25 samosval men 35 jumysshy jumyldyrylady.
Rezervýardy mehanıkalyq tazartý sýdy tolyǵymen tógip tastaǵannan keıin ǵana iske asqan, ol buryn-sońdy áýejaı kólinde jasalmaǵan.
Bıyl Almaty ákimdigi Áýejaı kóline qosa Qarasý kólin tazartýdy jalǵastyrady.
ALMATY