Qumar oıynǵa qarsy keshendi jospar ázirlenip jatyr. Qujatqa barlyq mınıstrlik usynystaryn tapsyrýy qajet. Keıin usynystar iriktelip, biriktirilip, júıelenip, Úkimet deńgeıindegi qujat jasaqtalady. Bul týraly keshe Memlekettik keńesshi Erlan Qarınniń tóraǵalyǵymen ótken Prezıdent janyndaǵy Jastar saıasaty jónindegi keńestiń kezekti otyrysynda aıtyldy.
Basqosýda lýdomanııaǵa jáne zańsyz oıyn bıznesine qarsy kúres sharalaryn qamtıtyn qujatty ázirleý barysy talqylandy. Memlekettik keńesshiniń aıtýynsha, lýdomanııa búginde elimizdiń ulttyq qaýipsizdigine qater tóndire bastaǵan. Kóbine jastar qumar oıyndardyń tuzaǵyna túsip jatyr. Sondyqtan Jastar saıasaty jónindegi keńes lýdomanııa men zańsyz oıyn bıznesine qarsy kúrestiń ortalyǵy retinde osy saladaǵy jumysty úılestirip keledi.
– Qolymyzdaǵy qujat 25 pýnktten turady. Onyń 15-i keńes músheleriniń usynystary negizinde daıyndaldy. Bul – jaqsy kórsetkish. Komanda retinde mańyzdy qujattyń qabyldaýyna kúsh salý kerek. Qabyldanǵannan keıin de qujattyń qalaı jumys istep jatqanyn, oryndalýyn baqylaýda ustaýymyz qajet, – dedi Erlan Qarın.
Býkmekerlik keńselerde sporttyq oıyndarǵa bás tigip, avtomattarǵa aqsha salatyndar jyl sanap kóbeıip barady. Densaýlyq saqtaý mınıstrliginiń byltyrǵy qyrkúıek aıyndaǵy dereginde 36 myńnan astam otandasymyz qumar oıynǵa táýeldi dep kórsetilgen. Derttiń qursaýyna ásirese, jastar túsip jatyr. Sondyqtan keńes osy saladaǵy jumysty barynsha úılestirip keledi.
Keńes músheleriniń paıymdaýynsha, qoǵam men memlekettik organdar lýdomanııaǵa qarsy kúresti jáne onyń aldyn alý sharalaryn júıeli túrde ári birlese júrgizýi kerek. Negizi elimizde ár salada bul baǵyttaǵy jumystar kúsheıtilgen. Desek te, túıtkildiń tarqaýy qıyn bolyp tur. Máselen, jaqynda Densaýlyq saqtaý mınıstrliginiń alqa otyrysynda Májilis depýtaty Ashat Aımaǵambetov lýdomanııa jáne esirtkige táýeldilikpen kúreste júıelilik joq ekenin ashyp aıtty.
«Qazir lýdomanııa, ishimdik pen nashaǵa táýeldilik máselesi ózekti bolyp otyr. Osyndaı áleýmettik mańyzy bar dertpen kúreste júıelilik joq. Ásirese, lýdomanııa boıynsha. Bizdiń oıymyzsha, emdeýdiń zamanaýı klınıkalyq hattamalary bolýy kerek. Biz MÁMS nemese MKBZK boıynsha jeke qarjylandyrý qarastyrý kerek dep oılaımyz. Sebebi lýdomandar sany artyp barady. Ishimdik pen esirtkige táýeldiler de kóbeıip otyr. Osy oraıda, densaýlyq saqtaý salasy tarapynan olarǵa sapaly, qoljetimdi qyzmetti jáne qupııalyqty qamtamasyz etý kerek. Qajet bolsa, jeke sektordy tartyp, olarǵa memlekettik tapsyrys berýge bolady», dedi depýtat.
Qarjylyq monıtorıng agenttiginiń aqparaty boıynsha 2022 jyly 5,5 myń onlaın-kazıno saıttary men akkaýnttary, 2023 jyly 2 myńnan asa saıt buǵattalypty. Taıaýda ǵana «Ádildik joly» RQB bastamasymen 300-den asa loto klýbtardyń jumysyn zańsyz uıymdastyrǵan qylmystyq top ustalǵan.
Memlekettik keńesshi jıyndy qorytyndylaı kele, elimizdegi reformalardyń urpaq bolashaǵy úshin jasalyp jatqanyn jáne jastar qazirdiń ózinde eldegi ózgeristerdiń bel ortasynda júrgenin atap ótti. Erlan Qarın sóziniń sońynda keńes aıasynda jastar máselesi kóterilip qana qoımaı, sol máseleler sheshilip jatqanyna nazar aýdardy.
Eske sala ketsek, keńestiń tikeleı qatysýymen ázirlengen taǵy bir mańyzdy qujat – Nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi jospary. Sıntetıkalyq esirtkige qarsy is-qımyldyń mańyzdylyǵy da alǵash ret osy keńes alańynda aıtyldy.