Elimizde balalarǵa arnalǵan 30-ǵa jýyq merzimdi basylym jaryq kóredi. Gazet-jýrnaldar jetkinshek oqyrmanynyń talǵamyna tatymdy, tushymdy dúnıe usyna alyp júr me degen saýal – óz aldyna bólek áńgime. Aıtpaǵymyz – balalar basylymynyń taralymy, jazylym jaıy.
Osy máseleniń san taraý túıinin tarqatýdyń qamyndaǵy is-shara ótti. Astana qalasyndaǵy mektep dırektorlary, pedagogter, kitaphanashylar, ata-analar qatysqan jıynda respýblıkalyq balalar basylymdarynyń bas redaktorlary men ókilderi jazylym máselesin talqyǵa saldy. Oqý-aǵartý mınıstrligi, Respýblıkalyq ǵylymı-pedagogıkalyq kitaphanasy jáne Astana qalasy Bilim basqarmasynyń alqaýymen ótken aýqymdy is-sharada balalar basylymdarynyń basshylary oqyrman men baspasóz arasyna altyn kópir ornatatyn pedagogterge bazynasyn bildirdi.
Prezıdent Qasym-Jomart Toqaev Ulttyq qoǵamdyq senim keńesinde balalardyń kitap oqýdan ajyrap bara jatqanyn eskertip, jaýapty salaǵa tapsyrma da júktegen edi. Sol kezde bekitilgen «Oqýǵa qushtar mektep» jobasyn búginde Oqý-aǵartý mınıstrligi tórt baǵytta júzege asyryp keledi. Budan syrt «Balalar kitaphanasy» baǵdarlamasyn qamtý da – qaýyrt sharýanyń biri. Kórkem ádebıetpen qatar merzimdi baspasózdi balaǵa jaqyndatýdyń tóte joly – jazylym.
Osy jyldyń qańtar aıynda Almatyda Oqý-aǵartý mınıstri Ǵ.Beısembaev pen Mádenıet jáne aqparat mınıstri A.Balaevanyń qatysýymen «Shyǵarmashylyq ıntellıgensııa – Qazaqstan balalaryna» atty kezdesý ótken bolatyn. Sol basqosýda júktelgen tapsyrmaǵa oraı 26 aqpanda Astanadaǵy №59 mektep-lıseıde osy aýqymdy is-shara uıymdastyryldy. Basylym men oqyrman arasyn uıystyrýǵa úndeıtin jıynda balalar basylymyna jazylýdaǵy kóldeneń kedergi men tosqaýyl da aıtyldy. Jazýshy Tolymbek Ábdiraıym, quramyna 11 basylym kiretin, sonyń ishinde balalarǵa arnalǵan «Ulan», «Drýjnye rebıata» gazetteri, «Aq jelken», «Baldyrǵan» jýrnaldary qaraıtyn «Qazaq gazetteri» JShS bas dırektorynyń orynbasary – Almaty basylymdarynyń jetekshisi Dýman Anash, «Aıgólek» jýrnalynyń bas redaktory Qymbat Ábildaqyzy, «Móldir bulaq» jýrnalynyń bas redaktory Dáýletbek Baıtursynuly jáne ózge de balalar basylymdarynyń ókilderi sóz alyp, jas oqyrman men baspasóz arasyndaǵy baılanys alshaqtap bara jatqanyna alańdaýshylyq bildirdi.
«Eki-úsh jyl buryn ótken Jazýshylar odaǵynyń quryltaıynda Oljas Súleımenov: «Bizdiń táýelsizdik alǵanymyzǵa 30 jyl boldy, osy otyz jyldyń ishinde biz kitap oqýdy doǵardyq», degen edi. Aqıqatyn aıtqanda, táýelsizdikten beri qaraı rasynda da oqyrman gazet-jýrnal, kitap oqýdan ajyrap qaldy. Besikten jańa bosap shyqqan baldyrǵannyń ózi smartfonǵa úńiletin qazirgi qoǵamda jas oqyrmandy balalar basylymymen qaýyshtyryp, baılanys jibin shıratý – mańyzdy sharýa. Búgingi basqosýdyń kózdegeni de – osy jaıt. Degenmen de sońǵy jyldary rýhanııatqa qaıta oıysyp, oqýǵa degen betburys kúsh alyp keledi. Qańtar aıynda Almatyda qos mınıstrlik basshylarynyń tize qosyp ótkizgen jıyny – sózimizge dálel. Seń setinep, sharýa qozǵaldy. Balalar basylymdaryna qoldaý-kómek kórsetý júzege assa, quba-qup», dedi Halyqaralyq «Alash» ádebı syılyǵynyń laýreaty T.Ábdiraıym. Jazýshy 40 jyl buryn 300 myń taralymmen taraǵan «Baldyrǵan» jýrnaly búginde 10 myń danamen jaryq kórýi qoǵamnyń «bir kem dúnıesi» ekenin basa aıtty.
Qymbat Ábildaqyzy mektep dırektorlary men muǵalimderge hám ata-analarǵa jetkinshekterdi balalar basylymymen dostastyrýǵa úndedi. 2000 jyldan beri «Aıgólek» jýrnalyn shyǵaryp kele jatqan aqyn balalar basylymdary qashanda pedagog qaýymnyń tileýlesi ekenin jetkizdi.
Dáýletbek Baıtursynuly byltyr jeti oblysty sharlap, oqyrmandarmen júzdesýde túrli kedergige kezikkenin, bul túıtkildi Oqý-aǵartý mınıstri Ǵanı Beısembaevqa da eskertkenin aıtty. «Mektep pen balalar basylymdary arasyndaǵy baılanystyń shylbyry úzilgeli tur. Úzilmeli jip qıylyp, oqyrman azaısa, balalar basylymdary jabylady. Qazir kez kelgen mektepke barsań, «Bizdi basylymǵa jazylyńdar dep májbúrleýge eshkimniń qaqysy joq» degen ýájdi kóldeneń tartady. Qaıda barsań da, aldyńnan shyǵatyny osy kep. Bilim oshaǵynyń basshysynan bastap, qosshysyna deıin osy ýájdi qalqan etedi. Munyń salqyny qatty tıdi, balalar basylymy men jas oqyrman arasyn alshaqtatyp jiberdi. Oqý-aǵartý mınıstrine balalar basylymy úshin tars jabylǵan mektepterdiń esigin qaıta ashýdy suradym», dedi D.Baıtursynuly.
Dýman Anash oqyrmandy qyzyqtyryp, talǵamyna tatıtyn tushymdy dúnıeler usyný basty murat ekenin jetkizdi. Respýblıkalyq «Aq jelken» jýrnalynyń ujymy oqyrmandar arasynda túrli baıqaý uıymdastyrý arqyly da oqýshy qaýymnyń údesinen shyǵyp kele jatqanyn jetkizdi.
«Byltyr «Aq jelken» jýrnalynda «Qaıtalanbas sát» degen taqyrypta oqýshylar arasynda fotobaıqaý uıymdastyryldy. Qazir barlyq oqýshynyń qolynda smartfon júredi. Kez kelgen jerde ózi fotoǵa túsire alady. Olardy osy qyrynan synap kórmek maqsatynda ótkizgen baıqaýǵa kóp týyndy joldandy. Sonymen qatar vıktorınalyq suraqtar boıynsha baıqaý uıymdastyrylady. Bıyl qazaq ádebıetiniń qabyrǵaly qalamgerleriniń mereıtoılary bar. О́re báıgesi de osy ataýly kúnderge oraı ótkiziledi», dedi D.Anash.
Búginde elimizde 30-ǵa jýyq balalar basylymy jaryq kóredi dedik. Eldi túgel qamtýǵa tıis merzimdi basylymdardyń barlyǵy derlik tómen tırajben taralady. Elimizdegi jeti myńnan astam mektep oqýshylary merzimdi basylymdarmen dostassa, bul olqylyqtyń orny tolar edi desken qalamgerler pedagogterge orasan senim artatynyn ańǵartty.