«MIND» atty qoldanbaly ǵylymı zertteý ortalyǵy ashyldy. Maqsut Narikbayev University-de ashylǵan ortalyq ǵylymı oı men tájirıbeni «Think & do tank» formatynda biriktiretin alań bolmaq. Atalǵan format tek usynystar berýmen ǵana shektelmeı, áreket etýge biregeı múmkindik jasaýdy kózdeıdi.
Ortalyqtyń ashylýynda Ǵylym jáne joǵary bilim mınıstri Saıasat Nurbek kúrdeli geosaıası, ekonomıkalyq jáne óńirlik jaǵdaılarda analıtıka, saraptamamen jumys isteýdiń ózekti ekenin atap ótti. Sondaı-aq ol Ǵylym jáne joǵary bilim mınıstrligi «MIND» ǵylymı-taldaý ortalyǵynyń jobalary men bastamalaryn qoldaýǵa daıyn ekenin jetkizdi.
Al mınıstrden soń sóz alǵan Maqsut Narikbayev University basqarma tóraǵasy Talǵat Nárikbaev ǵylymı ortalyqqa qatysty oıyn: «Qazirgi ýaqytta ýnıversıtet oqytýshylyq baǵyttan zertteý baǵytyna kóshýge arnalǵan jańa damý strategııasyn ázirledi, al «MIND» qoldanbaly ǵylymı zertteý ortalyǵy – osy strategııanyń ajyramas bóligi», dep jetkizdi.
Ortalyqtyń ashylýy aıasynda «MIND»-tiń keıbir ǵylymı zertteýleriniń nátıjeleri tanystyryldy jáne sońynda ǵylymı ortalyq boıynsha ekskýrsııa ótkizildi, onyń barysynda birqatar halyqaralyq uıymmen, memlekettik organdarmen jáne kvazımemlekettik kompanııalarmen áriptestik kelisimder jasaldy.
Ortalyqty uıymdastyrýshylardyń aqparatyna súıensek, «MIND» ortalyǵy Ortalyq Azııa men jalpy álemde turaqty damýǵa umtylý jáne qoldanbaly zertteýler júrgizetin sarapshylardy biriktirý maqsatynda quryldy. Sondaı-aq ortalyq táýelsiz qoldanbaly zertteýler júrgizý, strategııalyq sheshimder qabyldaý sapasyn damytý, keńes berý, áriptestik ornatý jáne «MIND» ınstıtýsıonaldyq turaqtylyǵyn qamtamasyz etýdi kózdeıdi. Al taldaý ortalyǵynyń qundylyqtary júrgizilip jatqan zertteýlerdiń táýelsizdiginen, akademııalyq adaldyqtan, yntymaqtastyq pen seriktestikten, ashyqtyqtan, qoǵammen baılanystan jáne nátıjelerge qol jetkizýden turady. Sonymen qatar «MIND» ortalyǵy – atalǵan ýnıversıtet pen Parlament Senatynyń birlesken jobalyq keńsesi. Bul ózekti zańnamalyq bastamalardy ázirleýge yqpal etedi.