Qyzylorda qalasyna qarasty Aqsýat aýyldyq okrýginiń turǵyny Sársenkúl Aralbaeva byltyr shulyq shyǵaratyn shaǵyn seh ashýǵa bekinip, bıyl sol josparyn iske asyrypty. Kásip ıesi suranys artyp, is alǵa bassa, óndiris kólemin keńeıtýge nıettenip otyr.
Kásipker taýardy «AQSÝAT» degen ataýmen satylymǵa shyǵarypty. Jazda memlekettiń bastamasymen iske asyp jatqan «Aýyl amanaty» jobasy týraly aqparatty aýyl ákiminiń turǵyndarmen kezdesý jıynynan estip, qalaı da qatysyp, táp-táýir múmkindikten qur qalmaýdy oılapty. Otbasymen oılasa kele, tapqan tabystyń basyn qosyp, kásip ashýdyń qam-qareketine kirisken. Árıne, aýylda turǵan soń, aýyl sharýashylyǵymen aınalysý týraly oıdyń birinshi keletini túsinikti. Biraq jobany úılestiretin jaýapty mamandardan talap-sharttardy surastyra kele, mal sharýashylyǵyn emes, ónerkásip ashý kerektigin bilgen.
– Ákimmen kezdesýde kásipkerlikti qoldaýǵa memleket 2,5 paıyzben nesıe berip jatqanyn bildik. Úıge kelgen soń, otbasymyzben qandaı kásip ashsaq bolady dep salalardy zertteı bastadyq. Sodan shulyq shyǵaratyn seh oıymyzǵa kele qaldy. Shıkizatty, qurylǵylardy qaıdan alamyz dep oılandyq. Osynyń barlyǵyn surastyra kele qarasaq, seh ashýǵa shamamyz keledi eken. Bıznes josparymyzdy túzip, tap-tuınaqtaı qylyp ázirlep ótkizip edik, birer aı ótkende qarashada qarajaty da túse qaldy. Qytaıdan qurylǵylar aldyrýǵa sondaǵy qazaq aǵaıyndar járdemdesti. Olar qurylǵymen qosa arnaıy sapasy jaqsy jipterdi de salyp jiberdi. Jipti Reseı, О́zbekstan, Qytaıdan aldyryp jatyrmyz. Baǵasy qymbatqa tússe de, taza maqtadan jasalǵan jip satyp alyp, sapaǵa kóp kóńil bólýdi oıladyq. Kásip bastaý biz oılaǵandaı jeńil emes eken. Eń áýeli shydamdylyq keregin túsindik, – deıdi kásipker.
Shetelden shulyq óndirisine qajetti keıingi úlgidegi qurylǵylardy aldyrǵan soń, olardy ornatý úshin Tashkentten maman shaqyrtqan. Mamannyń ózin birneshe apta izdestirip júrip, ázer taýypty. Qurylǵylardy túgel ornatqan soń, ony basqaratyn sheber tapqan. Ol kásipkerdiń balasyna tehnıkanyń qyr-syryn túsindirip, bir aıdaı oqytyp, úıretipti. Sársenkúl Aralbaeva joba aıasynda qolǵa tıgen shaǵyn nesıe kásip bastaýǵa yntalandyrǵanyn aıtty. Áıtkenmen jobany iske asyrý barysynda áýelgi qarajattan úsh ese kóbirek jumsalypty.
– Bizdiń esebimizshe, joba aıasynda bes mıllıon teńge alsańyz, bes jylǵa ústine shamamen 500 myń teńge qosylady. Ári kásipti dóńgeletip alyp ketkenshe bir jyl demalys beredi. Keleshekte isimiz alǵa basyp jatsa, kásipti keńeıtip, kıim-keshek shyǵarýǵa bolady. Ázirge sehta eki adam jumys istep jatyr. Jaqynda taǵy eki jumysshy alamyz. О́ndiris avtomattandyrylǵan, degenmen ár qurylǵyny basqarýǵa kemi bir-bir adamnan kerek. Birer kún buryn bazardan da ashtyq. Qazir irgeles aýyldardan kelip, bizdiń ónimdi alyp jatqandar kóbeıip jatyr. Sýpermarket qojaıyndarymen sóılesip kórdik. Olar shulyqtyń arnaıy qaptamasy bolýyn surap, sapaly óndiristi árdaıym qoldaýǵa ázir ekenin ańǵartty. Apta ishinde Tashkentke baryp, taýardyń qaptamasyn suranysqa saı daıyndaýdyń qam-qareketine kirisemiz. Baıqaǵanym, bul naryqqa tótep berý qıyn eken. Qytaı, Qyrǵyzstan, О́zbekstannan, tipti qazir Koreıadan da shulyq keledi. Osyǵan qaramastan biz ónimniń sapasyn túsirmeı, bastaǵan isimizdi ilgeriletýden tanbaımyz. Naryq talabynyń údesinen shyǵamyz, – deıdi S.Aralbaeva.
Otbasylyq kásip ashyp, ilgeriletýge kóńil bóle bastaǵan kásipker qazir kúnine 500 jupqa shamalas shulyq óndiredi eken. Onyń ishinde balalarǵa, ul-qyzdarǵa arnap tigilgen shulyqtardyń túr-túri bar. Kásipker onyń basym kópshiligin 150-200 teńgeden satylymǵa shyǵarsa, qalyń shulyqtardyń baǵasyn 400 teńge dep belgilepti. Bul ázirge úsh adamnyń uıymdasyp atqaryp otyrǵan sharýasy. Jaqynda kásipker sehqa taǵy jumysshy shaqyrsa, tıisinshe suranys artsa, óndiris kólemi de kezeń-kezeńimen ulǵaıatyn tárizdi. Ol úshin taýardyń sapasy men baǵasy kóńilge qonymdy bolýy keregin Sársenkúl Aralbaeva bizden jaqsy biledi.
QYZYLORDA