Mine, jańalyq. L.N.Gýmılev atyndaǵy Eýrazııa ulttyq ýnıversıtetiniń «Jasandy ıntellekt» ǵylymı zertteý ınstıtýtynyń ǵalymdary ChatGPT chat-botynyń qazaq tilindegi úlgisin jasady.
Ǵalymdar memlekettik tildegi jasandy ıntellekt júıesin bes aı ishinde ázirledi. ChatGPT chat-botynyń otandyq analogi úlken kólemdegi derekterdi taldap, suraqtarǵa jaýap beredi, mátin quraıdy, sonymen qatar qazaq tiliniń barlyq morfologııalyq jáne sıntaksıstik erejesin biledi.
«Biz qazaq tilinde birinshi iri LLM til úlgisin jasadyq. Júıe neırondyq jeli arhıtektýrasy negizinde qazaq tilindegi kez kelgen mátindi túsinýge jáne óz bilimine sáıkes jaýap berýge qabiletti. Bizdiń ChatGPT prototıpimiz qazaq tiliniń erejesin túsinip, áripter men býyndar, sózder men sóılemder arasyndaǵy barlyq tizbekti este saqtaıdy. Sonymen birge sıntaksıstik jáne grammatıkalyq turǵydan durys ári paıdalanýshynyń suranysyna saı keletin dárejede jaýap beredi», dedi «Jasandy ıntellekt» ǵylymı zertteý ınstıtýtynyń dırektory Álibek Barlybaev.
Ǵalymdar atalǵan júıege ádebı shyǵarmalar, normatıvtik qujattamalar men ǵylymı materıaldardy daıyndaý boıynsha tájirıbe júrgizgen. Endi olar jasandy ıntellekt modelin bilim berý úrdisine qoldanýdy usynbaq. Chat-bottyń bilimin qajetti aqparatty naqtylaý úshin paıdalanýǵa bolady.
«Mektep oqýshylary emtıhanǵa daıyndalǵanda testegi keıbir aqparatty, máselen, matematıka teńdeýi nemese hımııadaǵy termındi túsinbedi delik. Olar ony ózderi naqtylaǵysy keledi. Biraq qasynda muǵalim bolmaıdy. Sondaı kezde balalar júıege suraq qoıyp, tez jáne qysqa jaýap alady. Sodan keıin qosymsha suraq qoıa alady. Bul tehnologııany jalpy bilim beretin kýrstardy jıi oqıtyn bastapqy kýrstardyń stýdentterine de paıdalanýǵa bolady», dedi PhD doktory Á.Barlybaev.
Búginde IT salasyndaǵy ǵalymdar men mamandar jobanyń tehnıkalyq jáne serverlik múmkindigin nyǵaıtyp, odan ári damytýdy josparlap otyr.