Ilkidegi qazaqy qaǵıdaǵa den qoısaq, «talaptyǵa nur jaýar» degen sózdiń astarynda kátepti qara narǵa júk bolatyn mán bar ekenin túısiner edińiz. Oqýshynyń qolynan qurastyrylǵan, ánsheıinde kádege asa qoımaıtyn shyny qutylardyń qaldyqtary da ájetke jarap qalady eken.
Shortandy kentiniń №3 jalpy bilim beretin orta mektebiniń oqýshysy Áıgerim Anesıı josyǵy bólek ǵylymı jobany qolǵa alypty. Eldi eleń etkize tin-aq dúnıe. Ánsheıinde qoqysta shashylyp jatatyn shyny qaldyqtary kádege jaraıdy dep kim oılaǵan. Talapty jastyń ózi eshqandaı shyǵyn shyǵarmaı, aýyldastarynyń dastarqanyn nesibemen toltyrar ǵylymı jobany qolǵa alyp otyr. Matematıka jáne ınformatıka pánderiniń muǵalimi Jarqyngúl Asaýımen birlese otyryp, jumysqa qaýyrt kirisip ketken. Aldymen aýyl-aımaqtan árqıly dárilerden bosaǵan shyny qutylaryn jınapty. Keıin olardy bir-birine ádemilep japsyrǵan. Kókóskinge qajetti sý jınaıtyn bóshkelerdi ornalastyrypty. Qubyr da tartylǵan. Shatyrdyń ashylyp-jabylýy yńǵaıly bolýyn da umyt qaldyrmaǵan. Aıtpaqshy sýarý júıesi tolyq avtomattandyrylǵan.
– Jylyjaı jumysyn 2022-2023 oqý jyldary aralyǵynda synaqtan ótkizip kórdik, – deıdi joba jetekshisi Jarqyn Asaýı, – qoljetimdi materıaldardy qoldana otyryp jasalǵan jylyjaıda táp-táýir ónim óndirýge bolady eken.
Baıqampaz oqýshy Áıgerim Anesıı osy zertteý jumysyn respýblıkalyq «Zerde» ǵylymı joba baıqaýyna usynyp, júldeli orynǵa ıe bolypty. Qarshadaı qyzdyń talpynysy ábden quptarlyq. О́zge de zamandastary jaqsydan úırenip, alǵa umtylyp jatsa bir ǵanıbet emes pe?!
Aqmola oblysy,
Shortandy aýdany