Memleket basshysy múmkindigi shekteýli jandarǵa barynsha qoldaý kórsetý kerek ekenin mindettegen. Bul rette óńirlerde psıhonevrologııalyq aýrýmen aýyratyndardy beıimdeýge baǵyttalǵan ortalyqtar ashý mańyzdy. Atalǵan jaıt oblys ákimi Beıbit Isabaevtyń turǵyndarmen kezdesýinde de jıi kóteriledi. Endi, mine, Jetisý oblysynda alǵash ret psıhonevrologııalyq aýrýlarmen aýyratyndarǵa qyzmet kórsetetin kúndizgi bólimshe ashyldy.
«Jyl basynda memlekettik áleýmettik tapsyrys aıasynda psıhonevrologııalyq aýrýlary bar 18 jastan asqan adamdarǵa jartylaı stasıonar jaǵdaıynda arnaýly áleýmettik qyzmet kórsetý úshin «Jan shýaq – Jetisý» qoǵamdyq birlestigimen 3 jylǵa kelisimshart jasaldy. Maqsatymyz múgedektigi bar jandardy áleýmettendirý jáne qoǵamǵa, táýelsiz ómirge beıimdeý edi. Osyǵan oraı jobany júzege asyrýǵa oblystyq bıýdjetten qomaqty qarjy bólindi. Qoldanysqa berilgen bólimshe 18 jastan 35 jasqa deıingi múgedektigi bar adamdarǵa arnaýly áleýmettik qyzmet kórsetýde», deıdi oblystyq Jumyspen qamtý jáne áleýmettik baǵdarlamalardy úılestirý basqarmasynyń basshysy Ermek Mızambaev.
Ortalyqtaǵy emdik dene shynyqtyrý zaly velotrenajer, júgirý joly qurylǵylarymen birge ústel tennısi, gantel, gır, shahmat, doıby, toǵyzqumalaq, gımnastıkalyq dop, tigin mashınasy, toqýǵa arnalǵan jıyntyqtar, jattyǵýǵa arnalǵan jgýt, massaj kreslosy, mádenı is-sharalar ótkizýge arnalǵan mýzykalyq apparatýra, marker taqtasymen jabdyqtalǵan. Medısınalyq kómek kórsetýge jáne arnaıy áleýmettik qyzmet kórsetetin mamandarǵa arnalǵan kabınetter zamanaýı qural-jabdyqpen tolyqqan.
«30 orynǵa arnalǵan bólimshege 18 qyzmetker jumysqa alyndy. Onyń ishinde psıholog, defektolog, muǵalim, jattyqtyrýshy, áleýmettik qyzmetker bar. Qyzmet alýshylarǵa turmystyq, medısınalyq, psıhologııalyq, pedagogıkalyq, eńbek, mádenı, ekonomıkalyq, quqyq salasy boıynsha qyzmet kórsetiledi. Olardy tasymaldaý úshin 16 oryndy avtokólik jalǵa alyndy. Aldaǵy ýaqytta aýlany qorshap, jazǵy demalys oryndary men basseın qurylysyn salýdy josparlap otyrmyz», deıdi «Jan shýaq – Jetisý» qoǵamdyq birlestiginiń basshysy Gúlnaz Tileýberlınova.
Shynynda, psıhonevrologııalyq aýrýmen aýyratyn jastardy úıde qaraýdyń ózi otbasy múshelerine salmaq túsiredi. Buǵan qosa olardyń ómir súrý sapasy, qoǵam ómirine qatysýy da qıyn bolary anyq. Qanshama ata-ana mamandyǵy bolsa da aýrý balalardy qaraımyz dep jumysqa shyǵa almaı úıde otyrǵanyn esepteı berińiz. Atalǵan bólimshe ata-analardyń sol qıyndyǵyn jeńildetedi.
«Ata-ana retinde alǵysym sheksiz. Bala qaraýmen úıde otyrǵanyma 15 jyldan asty. Olardyń júregi taza, kóńili pák bolǵanymen ortaǵa beıimdelýi qıyn. Kóp nárseden bas tartýǵa týra keledi. Mamandyǵym muǵalim, biraq bala qaraýmen jumys isteı almadym. Qazir zeınetkermin, jumys ótilim bolmaǵandyqtan zeınetaqym da mardymsyz. Qazir qanshama jas ata-ana men sekildi kúı keship júr. Sondyqtan osyndaı ortalyqtar kóbirek ashylsa, olardyń da óz qalaýymen jumys isteýine múmkindik bolar edi», deıdi Taldyqorǵan qalasynyń turǵyny Lázzat Arystanova.
Jetisý oblysy