Elordada erekshe bilim berýdi qajet etetin balalarǵa arnap ortalyq ashyldy. Inklıýzıvti bilim berý ortalyǵy erekshe qajettiligi bar balalardy jalpy bilim berý úderisine tıimdi ári nátıjeli túrde áleýmettendirýge múmkindik beredi.
№43 qosymsha bilim berý mektep-ortalyǵy negizinde qurylǵan resýrstyq ortalyqtyń ashylýyna «Shevron» kompanııasy, «Dara» qaıyrymdylyq qory qoldaý bildirgen. Uıymdastyrýshylardyń aqparatyna súıensek, atalǵan ortalyq – muǵalimderge oqý barysynda ınklıýzııa qaǵıdattaryn júzege asyrýǵa kómektesetin jáne bilim alýda erekshe qajettiligi bar balalarǵa oqý oshaǵynda kedergisiz áleýmettik orta jasaýǵa baǵyttalǵan mektep keńistiginiń bóligi. Osyndaı ortalyqtardyń negizinde balalarmen jumys júrgizilip, ata-analarǵa keńes beriledi, sondaı-aq muǵalimderge arnalǵan ádistemelik usynymdar ázirlenedi.
«Dara» qorynyń ókili Sáýle Beksultanova resýrstyq ortalyqta arnaıy mamandar jumys isteıtinin jetkizdi. «Jalpy bilim beretin mektepterde oqıtyn erekshe qajettiligi bar balalar kóbinese mamandardyń qoldaýyna, mezgil-mezgil demalýǵa jáne relaksasııaǵa muqtaj. Osynyń barlyǵy resýrstyq ortalyqty uıymdastyrýda, psıholog, logoped, defektolog jáne basqa muǵalimderdiń balalarmen jumys isteıtin keńistikti ázirleý kezinde eskeriledi. Osy tásildiń nátıjesinde balalarǵa oqý úderisine qosylý ońaıyraq», dedi ol.
Munda damý erekshelikteri bar balalarmen jumys isteıtin jalpy pánderdiń muǵalimderi de, sondaı-aq ata-analar da keńes ala alady. Sonymen qatar resýrstyq ortalyqta úıde oqytylatyn balalardy áleýmettendirý boıynsha jumystar júrgizilip jatyr. Jańa resýrstyq ortalyq arnaıy jıhazdarmen jáne damytýshy materıaldarmen jabdyqtalǵan, onda emosıonaldy demalý aımaǵy, jeke jáne toptyq jumys aımaqtary ornalasqan. Aldaǵy ýaqytta № 43 mekteptiń psıhologııalyq-pedagogıkalyq súıemeldeý qyzmetine erekshe qajettiligi bar 16 balaǵa qoldaý kórsetetin psıholog, pedagog-assıstent, áleýmettik pedagog, logoped-defektolog kiredi.