Vılen Borısovıch Molotov-Lýchanskıı. Bul esim elge belgili. II dárejeli «Dostyq» ordeniniń, «Qazaqstan Respýblıkasynyń densaýlyq saqtaý isiniń úzdigi» tósbelgisiniń ıegeri. Medısına ǵylymdarynyń doktory, professor. Keıipkerimiz el men jerdi kıe kóredi. Qazaqqa degen qurmeti jyl ótken saıyn artpasa, esh kemigen emes.
Ol búginde – oblystyq Qazaqstan halqy Assambleıasynyń Ǵylymı-saraptamalyq tobynyń jetekshisi, «Qaraǵandy evreı mádenıeti ortalyǵy» qoǵamdyq birlestiginiń tóraǵasy, Qazaqstan halqy Assambleıasynyń múshesi. Balqashtyń baýyrynda dúnıe dıdaryn ashqanyna da byltyr 70 jyl boldy. Sanaly ǵumyryn el damýyna, birlik pen beıbitshiliktiń saltanat qurýyna arnaǵan jan.
«Meniń kishi Otanym – Balqash qalasy. Áıgili Kókshe teńizdiń jaǵasy. Segizinshi synyp oqyp júrgende esse jazǵanym áli esimde. Sonda jýsannyń ıisin, jazyq dala men kóldiń tolqyny týraly tolǵanyp jazǵanmyn. Qazaq jerine degen ińkárligim áli sol qalpy. Kıev dalasynda eki jyl áskerı boryshymdy ótegende el men jerimdi qatty saǵyndym. Bul ótken ǵasyrdyń 70-jyldary edi. 1937 jyly meniń ájem Qaraǵandydaǵy Dolınkada jazasyn ótegen soń 1952 jyly anam ekeýi qaıta qaýyshty. Osylaısha, men Balqash qalasynyń beıbit aspanynda dúnıege keldim. Ájem ary úshin ómir súrgen, adamdardyń ala jibin attamaǵan jibi túzý jan edi. Al anam Qazaqstandy ómiriniń sońyna deıin Qazaqstandy súıip ótti. Ájemniń «Biz bul eldiń halqynan meıirim men shapaǵatty kóp kórdik deıtin», dep ótkenine kóz júgirte ótti V.Borısovıch.
Keıipkerimiz «Birligi bosańsyǵan memlekettiń berekesi de ketedi» degen ustanymda. «Ultty uıystyra bilý – úlken erlik. Al oǵan bastaıtyn – otandastardyń aldaǵy kúnge degen senimi. Qaıdan bilip otyr demeńiz. Az ǵumyr jasadym dep te aıta almaımyn. Ǵasyr sońyndaǵy tarshylyq teperishin kórgen bireý bolsa, sonyń biri – menmin. Men ǵana emes, shańyraǵy opyrylyp ortasyna túsken KSRO halqy túgeldeı kórgen bolar. Kóshkeni kóship, ketkeni ketip jatty. Biraq erteńgi jarqyn bolashaqqa degen senim júregimde bir sátke bolsyn sóngen emes. Talaptandym, eńbektendim. Birneshe qyzmetti qatar atqardym. Otandastarymyz túri men túsine, ulty men dinı nanym-senimine qaramastan, bir shańyraq astyna birikti. Elimniń kópshildigine erekshe rızamyn jáne alǵysymdy bildirgim keledi», deıdi ol.
Vılen Borısovıch – terapııa salasynda ǵana emes, onymen qatysty barlyq ǵylymdy tutas meńgerip, aldynan ótken naýqastyń rııasyz alǵysyn alǵan adam. Qaraǵandy klınıkalarynda professormen shaǵyn jáne úlken quramda jumys istemegen, tym kúrdeli jaǵdaılarda, dárigerlik konsılıýmdarda altynǵa bergisiz keńesin almaǵan áriptesteri joq shyǵar. Munymen qosa, 150-ge jýyq ǵylymı eńbek alys-jaqyn shetelderdiń merzimdi basylymynda jaryq kórgenin de atap ótkenimiz jón.
Qaraǵandy oblysy