Baýyrjan Momyshuly aýylynda dúnıege kelgen Sýdaba Metalımova ulty ázerbaıjan bolsa da, jergilikti qazaqtarmen tonnyń ishki baýyndaı aralasyp ósti. Qazaq tilin de bir kisideı úırenip alǵan.
«Men kópbalaly otbasynda dúnıege keldim. Otbasymyzben Jýaly aýdanynyń ortalyǵy Baýyrjan Momyshuly aýylynda turdyq. Jergilikti halyqpen tyǵyz aralastyq. Aýyldaǵy Arkadıı Gaıdar atyndaǵy orta mektepti aıaqtaǵan soń Taraz qalasyndaǵy «Parasat» kolledjinde bilim aldym. Keıin Shymkent qalasyndaǵy Halyqtar dostyǵy ýnıversıtetin támamdadym», deıdi ol.
Bala kúninen bilimge qushtar Sýdaba 2017 jyly alǵash eńbek jolyn Baýyrjan Momyshuly atyndaǵy №1 gımnazııada baǵdarlamashy bolyp bastapty. Keıin aýdandyq «Jastar ortalyǵy» mekemesinde eńbek etken. Araǵa az ýaqyt salyp, din isteri jáne taldaý bóliminiń meńgerýshisi qyzmetin atqarǵan.
Bilim salasyna ańsary aýǵan Sýdaba 2021 jyly Taraz qalasyndaǵy №7 gımnazııaǵa jumysqa ornalasady. Bar bilgenin jas urpaqtyń boıyna darytýdy maqsat tutqan maman qazir ınformatıka pániniń muǵalimi bolyp eńbek etip júr.
«Mektebimizde «Adal urpaq» dep atalatyn eriktiler klýby qurylǵan. Quramyna bilim ordasynyń 120 kóshbasshysy engen klýbtyń basty maqsaty – quqyqtyq jáne azamattyq mádenıetti qalyptastyrý, balalardy adaldyqqa tárbıeleý. Osy baǵytta oqýshylar arasynda áleýmettik-quqyqtyq bilimdi zerdeleý, urpaqqa bilgenimizdi tereńirek úıretý máselesine dep qoıyp júrmiz. Jumysyn jańadan bastaǵan klýbtyń kóp uzamaı oń nátıje beretinine senimimiz mol. Mektep muǵalimderi kózdegen maqsatqa qol jetkizý úshin ter tógip keledi. Biz oqýshylardyń boıynda jemqorlyqqa qarsy mádenıetti qalyptastyrýǵa aıryqsha basymdyq beremiz. Barlyq jumys pen uıymdastyrylatyn is-sharany osy baǵytqa saı ótkizemiz. Qazir klýbta úıirme jetekshisi retinde eńbek etip júrmin. Jańadan ashylǵan klýbtyń jumysy endi júıelenip keledi», deıdi ol.
Muǵalim Sýdaba óziniń shyǵarmashylyq áleýetin tıimdi paıdalanyp, oqýshylardyń boıynda memleket, qoǵamǵa degen adaldyq pen janashyrlyqty qalyptastyryp, jeke tulǵany tárbıeleýdi maqsat tutady. Qazir osy baǵytta bilim alýshylarǵa bar bilgenin úıretip júr. Eń bastysy, shákirtteriniń boıynan elge, qazaq halqyna degen adaldyqty kórgisi keledi.
«Keıingi birneshe jyldyń bederinde Qazaqstanda Alǵys aıtý kúni arnaıy mereke retinde toılanyp keledi. Bul merekeniń biz úshin mańyzy zor. Atyraý men Altaı arasyn meken etken halqymyzdyń, ásirese jastardyń arasynda kelisim men dostyqty nyǵaıta túskenniń esh artyqtyǵy joq. Osy turǵydan alǵanda arnaıy bekitilgen merekeniń mańyzyn tereńirek túsine túsemiz. Dostyq pen tatýlyqtan asqan qundylyq joq. Ár azamat osy bir baǵa jetpes qundylyqty baǵalaýy kerek. Talaı ult pen ulysty baýyryna basqan qazaq halqyna osy kıeli jerdi panalap kelgen ár ulttyń alǵystan basqa aıtary joq. Oǵan eshkim kúmán keltire qoımas. Búginde halyqtar arasyndaǵy birlik pen dostyqqa aıryqsha mán berilip otyrǵany anyq. Osyny óskeleń jas tereńnen túsingeni durys. Ol úshin ustazdar qaýymy da aıanbaı eńbek etýge tıis. О́ıtkeni biz jastardyń boıyna demokratııalyq qoǵamnyń qundylyqtary men negizin sińirýimiz kerek. Bul – barshamyzdyń asyl boryshymyz», deıdi ol.
Jyldar boıy izdenistiń izine túsken jas ustazdyń tanymy erek, oıy zerek. Memlekettik tildi myqtap meńgergen Sýdaba muny óziniń paryzy dep esepteıdi. Qaı kezde de jańashyldyqqa basym beretin muǵalimniń alar asýy kóp ekenine senimi kámil. Ulty ózge demesek, tili men tilegi bir Sýdabanyń alǵa qoıǵan maqsaty aıqyn. Ol eseli eńbegimen bıikterdi baǵyndyrǵysy keledi.
Jambyl oblysy